Аҟәа. Нанҳәамза 9, 2024 шықәса. Аԥсныпресс. Очамчыра ақалақь аҿы урыстәылатәи арратә база ашьақәыргылара азԥхьагәаҭаны иҟаӡам. Очамчыратәи амшынбаӷәаза аҿы урыстәылатәи арратә база аҿы аҳәаахьчаратә катерқәа мацара гылоуп, ҳәа ТАСС ахь адырра ҟаиҵеит Аԥсны адәныҟатәи аусқәа рминистр Сергеи Шамба.
«Очамчыра изакузаалак арра-мшынтә база ҳәа акгьы ыҟаӡам, аҟаҵарагьы азԥхьагәаҭаӡам, иҟоу аҳәаахьчаратә ҭыԥ мацара заҵәык ауп, уаҟа аҳәаахьчаратә катерқәа гылоуп. Ҳара ахҭысқәа еиуеиԥшым ала рыҿиара ҳазхиоуп», -ҳәа иҳәеит иара.
Аминистр Амшын Еиқәа ҩаԥхьа аибарххара ахьыҟоу регионны ишыҟало азгәеиҭеит, араҟа аҵыхәтәантәи аамҭазы лассы-лассы ицәырҵуа иалагеит НАТО аӷбақәа, америкатәии НАТО иатәууи аԥшыхәратә ҳаирпланқәа ахаԥыруеит.
«Уи зегьы ҳара агәҭынчымра ҳазцәырнагоит. Аибашьратә хҭысқәа Амшын Еиқәа аӡеизакыра аҿы иахьымҩаԥысуагьы агәҭынчымра узцәырнамгар залшаӡом» , - ҳәа иҳәеит иара.
Аминистр иажәақәа рыла, ҭагалан Қырҭтәыла алхрақәа мҩаԥысраны иҟоуп, макьаназы еилкааӡам амчрахь инеиуа.
«Иахьа аоппозициа аҿы иҟоу Михаил Саакашвили идгылаҩцәа анапхгарахь инеир, усҟан урҭ рганахьала џьара авантиурак ҟалар шалшо аҟара аадыруеит, аха ус анакәха, зегьы раԥхьаӡа иргыланы дара рхаҭақәа рзы хра злоу алҵшәа ҟалаӡом. Аӡәгьы ҿыц аибашьра алагара иҭахӡам, уи аԥстәбара ҿыцқәа рыҟалара ауп иаанаго. Ҳара ҳахәҭаала, уи ҳҭахӡам», - ҳәа иҳәеит Сергеи Шамба.
https://tass.ru/mezhdunarodnaya-panorama/21559109
