Аҟәа. Нанҳәамза 5, 2024 шықәса. Аԥсныпресс. Аԥсны ахәыҷы изинқәа рыхьчаразы Азинмчы змоу Мактина Џьынџьалԥҳа Аԥсны Ашәарҭадаратә маҵзура аусзуҩцәа иааныркылаз аҟәатәи аҵаҩы иганахьала ашьауӷатә ус ахацыркразы ахҳәаа ҟалҵеит.
«Аԥсны Аҳәынҭқарратә шәарҭадара Амаҵзура апресс-маҵзура 01.08.24 шықәсазы абжьаратәи ашкол № 6 аҵаҩы иаанкылареи, уи иганахьала ашьаус ахацыркреи рзы официалла иҟанаҵаз адырра инамаданы, сара, Ареспублика Аԥсны иахьаҵанакуа ахәыҷы изинқәа рыхьчаразы Азинмчы змоу лаҳасабала, еиҵагыло ҳабиԥара ркибершәарҭадара аганахьала ӷәӷәала агәҭынчымра аасырԥшуеит», - ҳәа аҳәамҭа ҟалҵеит лара.
Мактина Џьынџьалԥҳа Ахәыҷы изинқәа рыхьчаразы Азинмчы змоу Иаппарат зықәра наӡам асоциалтә ҳақәеи амессенџьерқәеи рҿы ишәарҭоу онлаин-ресурсқәа ралагалара аԥхьырҟәҟәаара азы активла арккара-рдырратә усура шымҩаԥнаго атәы азгәалҭеит. Аҵарашықәс ҿыц алагара инаркны ари аусура еиҳагьы ирӷәӷәахоит.
Ишәарҭоу аонлаин ресурсқәа ҿыцны рактуализациа инамаданы, ахәыҷы изинқәа рыхьчаразы, Азинмчы змоу аҭаацәа рахь аҳәара ҟалҵоит доусы рхәыҷқәа макьаназы иӷәӷәам рыпсихика ишакәым ала анырра азҭарц зылшо атәымуаа рҳәатәы иақәныҟәаны азакәан иаҿагыло ахымҩаԥгашьа рацәыхьчаразы иахәҭоу ахылаԥшра рырҭаларц.
«Рыцҳарас иҟалаз, уажәы аекстремисттәи атеррористтәи аиҿкаарақәа ркураторцәа иҿыцу алахәылацәа, аиҳарак зықәра наӡам радыԥхьлареи ркоммуникациеи рзы аиҳарак Аинтернет рхы иадырхәо иалагеит», – ҳәа иазгәаҭоуп аҳәамҭа аҿы.
Мактина Џьынџьалԥҳа иара убас аҭыԥантәи амассатә информациа ахархәагақәеи азинхьчаратә структурақәа рыпресс-маҵзурақәеи иҟарҵо аофициалтә дырраҭарақәа рҿы зықәра намӡац рхаҭаратә дыррақәа рымҳәаларц агәҽанҵара ҟалҵеит.
«Агәҽанҵара шьаҭас иамоуп, зықәра намӡац ахәыҷы ихатә дыррақәа рыхьчареи рымаӡеи рыхьчара апринципқәа, избан акәзар хыхь зыӡбахә ҳәаз адыррақәа рыларҵәара иара изы еицәоу алҵшәақәа аанагар алшоит (иқәлацәа, иҩызцәа, иҭынхацәа, игәылацәа, уҳәа рыбжьара ақәымчра)», – ҳәа иазгәалҭеит Мактина Џьынџьалԥҳа.
