Аҟәа. Цәыббрамза 12, 2022 шықәса. Аԥсныпресс. Атәыла аԥыза-министр Алеқсандр Анқәаб Нхыҵ-Кавказтәи Афедералтә университет аделагациа идикылеит. Аделегациа напхгара аиҭоит ауниверситет аректор Дмитри Беспалов.
Аԥсны аминистрцәа Реилазаара апресс-маҵзура иҟанаҵо адыррақәа рыла, «Нхыҵ-Кавказтәи Афедералтә университет аделегациа Аԥсны аԥыза-министр аусецуреи аметодикатәи анаука-техникатәи цхыраара аҭареи ареспублика ашколқәа рырҵаҩцәа разыҟаҵареи рзанааҭтә дырра аҩаӡара аизырҳареи рганахьала адгылара аҭареи рзы иҟаиҵаз аҳәара зныз ашәҟәы аҭак аҳасабала Урыстәылатәи Афедерациа Анапхгара анапынҵа аҳәаақәа ирҭагӡаны Аԥсныҟа иааны иҟоуп. Нхыҵ-Кавказтәи афедералтә университети (ақ. Ставрополь) аԥсуа гани абар шьҭа акыр аамҭа иалагӡаны аусецура рыбжьоуп.
2014 шықәса инаркны 2020 шықәсанӡа азанааҭдырра аҩаӡара аизырҳара акурсқәа аҳәаақәа ирҭагӡаны азыҟаҵара иахысит 1 725-ҩык Аԥсны аҵарадырра аусхкы аҿы аус зуа; 2020 шықәсазы Аԥсны Анаукақәа Ракадемиеи Аԥсны Аҳәынҭқарратә Университети рылшарала иаԥҵан жәларбжьаратәи анаука-ҭҵааратә лабораториақәа ԥшьба. Урҭ аҭоурых, азиндырра, аекономика аусхкқәа рҿы аҭҵаарақәа мҩаԥыргоит; 2018 - 2021 шш. Аԥсны Анаукақәа Ракадемиа алархәны афундаменталтә ҭҵаарақәа рзы Урыстәылатәи афонд жәларбжьаратәи агрантқәа ҩба рыҭара мҩаԥган.
Нхыҵ-Кавказтәи Афедералтә Университет ацхыраарала аԥсуа ҵарауаҩцәа 42 инарзынаԥшуа рнаукатә усумҭақәа кьыԥхьхеит, жәларбжьаратәи аконференциақәа ҩба мҩаԥгахеит.
Ирҳаз аусеицуратә ԥышәа хра злоу аҟазшьа амоуп ҳәа иазгәаҭан, убри аҟнытә Аԥсны анапхгара аҩганктәи аизыҟазаашьақәа рыҿиара акыр аҵакы ду амоуп ҳәа иԥхьаӡоуп, ҳәа аиԥылара аҿы иазгәеиҭеит атәыла аԥыза-министр Алеқсандр Анқәаб.
Сынтәа ареспублика арҵаҩцәа, аҳәынҭқарратә уаажәларратә усзуҩцәа, аџьатә кадрқәа, атуризми асасааирҭатә усхки рыспециалистцәа разыҟаҵара, азеиԥш ҵараиура асистема аусзуҩцәа разыҟаҵара, аурыс бызшәа арҵаҩцәа рзы атренингқәеи асеминарқәеи амастер-классқәеи рымҩаԥгара, уҳәа егьырҭ аусмҩаԥгатәқәа рымҩаԥгара азы Аресурстә ҭҵаара-дырратә центр аусура аиҿкаареи ашьақәгылареи ирызкны аусмҩаԥгатәқәа азԥхьагәаҭаны иҟоуп.
Аԥсны Анаукақәа Ракадемиеи Аԥсны Аҳәынҭқарратә Университети абҵарамза, 2022 шықәсазы Нхыҵ-Кавказиәи афедералтә Университет абаза аҟны жәларбжьаратәи анаука-практикатә конференциа амҩаԥгара азԥхьагәаҭаны иҟоуп.
