Адыгеиатәи арегионалтә уаажәларратә еиҿкаара «Аԥсны Аџьынџьтәылатә еибашьраҟны хатәгәаԥхарала еибашьуаз»  ахантәаҩы Мадин Тлишев, хатәгәгәаԥхаралатәи аибашьцәа  рыхьӡала аҩ-тәылак рнапхгаҩцәа гәыблыла аԥсшәа реиҳәеит. Аԥсуа делегациа иҟарҵо азҿлымҳаразы иҭабуп ҳәа реиҳәеит.

Мураҭ Кәумпилов иганахьала, иазгәеиҭеит хатәгәаԥхаралатәи аибашьцәа ирыдҳәалоу азҵаарақәа еснагь ахаҵгылара шрымоу, ареспубликагьы  есқьынгьы ауаажәларратә еиҿкаарақәа, иара убас хатәгәаԥхаралатәи аибашьцәа рыдгылара ишазхиоу.

Аиԥылараҟны ишьҭыхын ақырҭуа-аԥсуа еибашьраҿы иҭахаз Адыгеиатәи ҩыџьа хатәгәаԥхаралатәи еибашьцәа ҩыџьа рыԥсҭазаара ианалҵ ашьҭахь «Аԥсны Афырхаҵа» ҳәа ахьӡ рыхҵара азҵаара. Иара убас адгылара аҭан хатәгәаԥхаралатәи аибашьцәа рыхьӡала Аԥсны ашҭақәа руак аҟны абаҟа аргылара.

Аиԥылараҟны иара убас иалацәажәеит Аԥсни Адыгеиеи русеицура арҿиара иадҳәалаз азҵаарақәа. Мураҭ Кәумпилов иҳәеит аҵарадырра, агәабзиарахьчара, аспорт уҳәа егьырҭ ахырхарҭақәа рыла аусеицуразы Аиқәшаҳаҭра азырхиара ишаҿу.

«Ҳара еснагь абаҩхатәра злоу аҿар реиԥылара мҩаԥаҳгоит, ҳара ҳаҟны аԥхынтәи агәабзиарачаԥаратә ԥсшьара бзианы еиҿкаауп. Ари ашықәс азы Херсонск аобласт Гениатәи араион аҟынтә, иара убас Донбассынтә ашколхәыҷқәа ҳадаҳкылеит. Адыгеиа аиқәшаҳаҭра аҳәаақәа ирҭагӡаны, аиашьаратә республика аус ацура иазхиоуп ари аусхк аҟны еиԥш егьырҭ  ахырхарҭақәа зегьы  рыҟны. Ари апроцесс рхы аладырхәуеит ауаажәларратә еиҿкаарақәагьы» - ҳәа иҳәеит иара.

Аԥсны Аҳәынҭқарра Ахада адгылара аиҭеит Аԥсны  аиашьаратә республикақәа - Адыгеиеи, Ҟарачы-Черқьесиеи, Ҟабарда-Балкариеи рыҩны аартразы иҟаҵаз ажәалагала.

Аусмҩаԥгатә аҳәаақәа ирҭагӡаны, Аԥсны Аҳәынҭқарреи Нхыҵ Кавказтәи ареспубликақәеи рыбжьара аҭҵаарадырратә центрқәа реимадара арӷәӷәаразы, Керашев ихьӡ зху Адыгеиатәи Ареспубликатә Агуманитартә ҭҵаарадыррақәа ринститут адиректор  Адам Ҭлеужь ианашьан «Ахьӡ-Аԥша» аорден  III аҩаӡара.