Аҟәа. Цәыббрамза 11, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа Башар Асад иира Амш идиныҳәалеит.
«Шәиара Амш инамаданы ишәыдышәкыл гәык-ԥсыкала иҟаҵоу адныҳәалара. Адунеи зегьы аҿы Шәара зтәыла амилаҭтә интересқәа хьаҳәхьачарада изыхьчо, уи аизҳазыӷьареи ашәҭыкакаҷреи рзы хамеигӡарыла зымчи зылшареи адызҵо, ахара иԥшуа, акыр здыруа аҳәынҭқарратә усзуҩны шәеицырдыруеит.
Агәра ганы сыҟоуп, Аԥсны Аҳәынҭқарреи Шьамтәылатәи Арабтә Республикеи ирыбжьоу аимабзиаратә еизыҟазаашьақәеи хра злоу аусеицуреи ҳаԥхьаҟа аҩтәылак рыжәларқәа ринтересқәа рыхьӡала аҳәаақәа шыҭбаахало ессааира ишыӷәӷәахало», - ҳәа иаҳәоит адныҳәаратә цҳамҭа аҟны.
Аслан Бжьаниа Шьамтәылатәи Арабтә Республика Ахада Башар Асад агәабзиара, аизҳазыӷьара, Шьамтәыла ажәлар хра злоу аҿиара иазку аҭакзыԥхықәра зцу аҳәынҭқарратә маҵура аҿы аихьӡарақәа изеиӷьаишьеит.
Источник: https://apsnypress.info/ru/novosti/item/1192-aslan-bzhaniya-pozdravil-bashara-asada-s-dnem-rozhdeniya.
© АПСНЫПРЕСС.
