Аҟәа. Цәыббрамза 9, 2022 шықәса. Аԥсныпресс. Никарагуа иҟоу Аԥсны Ацҳаражәҳәаҩ Инар Ладариа цәыббрамза 8 рзы Никарагуеи Аԥсни реиҩызара азы адепутатцәа ргәыԥ ирҭаз ааԥхьарала ареспублика Амилаҭтә Ассамблеиа даҭааит, ҳәа иаанацҳауеит Аԥсны адәныҟатәи аусқәа Рминистрра аофициалтә саит.
Инар Ладариа адепутатцәа ирҭаз ааԥхьара азы иҭабуп ҳәа реиҳәеит, Аԥсны аҭоурыхи уи ажәлар ахақәиҭреи асуверенитети рзы рмилаҭтә қәԥара атәы рзеиҭеиҳәеит. Амилаҭтә Ассамблеиа адепутатцәа русура атәы изеиҭарҳәеит, Аԥснытәи Апарламент аҿы аҩ-тәылак рзакәанԥҵаратә усбарҭақәа рпарламентбжьаратәи аимадара арӷәӷәара иазкхо Никарагуа аҩызара азы адепутатә гәыԥ шаԥҵахо азы агәыӷрагьы аадырԥшит. Аԥсны Ацҳаражәҳәаҩ иарбоу аԥшьгара дшадгыло иҳәеит. «Агәра ганы сыҟоуп, аамҭа кьаҿ иалагӡаны Аԥснытәи Апарламент аҿы ас еиԥш агәыԥ шаԥҵахо, апарламентбжьаратәи аусеицурагьы еиҳа аҳәаақәа шыҭбаахо», – ҳәа иҳәеит адипломат. Аиԥылара аԥхарра аҵаны имҩаԥысит.
