Аҟәа. Нанҳәамза 10, 2022 шықәса. Аԥсныпресс. Нанҳәамза 10, ахашаҽны, имҩаԥысит Аԥсны анаукақәа Ракадемиа аилатәара, ҳәа иаанацҳауеит Аԥсны анаукақәа Ракадемиа апресс-маҵзура. Аизара иалахәыз Аԥсны анаукақәа Ракадемиа иаҵанакуа аҭҵаарадырратә Институтқәа рдиректорцәа ралхра азы еицҿакны рыбжьы рҭиит:
Д.И.Гәлиа ихьӡ зху Аԥсуаҭҵааратә Институт адиректорс далхуп афилологиатә наукақәа ркандидат Арда Енвер-иԥа Ашәба;
Аекологиа Аинститут аиҳабыс далхуп - абиологиатә наукақәа ркандидат - Роман Саид-иԥа Дбар;
Аԥсны Анаукақәа Ракадемиа аекономикеи азини Ринститут адиректорс далхуп – аекономикатә наукақәа рдоктор, Аԥсны Анаукақәа Ракадемиа академик Заур Иван-иԥа Шьалашьаа.
Аԥсны Анаукақәа Ракадемиа Аԥҟаԥҵәеи иашьашәалоу аԥҟарақәеи инарықәыршәаны, Аинститутқәа ралхра иадҳәалоу апроцедура Анаукақәа Ракадемиа аилатәараҿы имҩаԥысуеит.
Анаҩс аизара иалахәыз аҵарауаа ҿарацәа аԥсуа бызшәала инарыгӡаз русумҭақәа рзы Анаукақәа Ракадемиа апрезидиум апремиа рыҭара азы Аԥҟара аиҭакрақәеи ацҵақәеи ралагалара иалацәажәеит.
Аусмҩаԥгатә ахыркәшамҭаз еизаз рнапеинҟьарала Аԥсны Анаукақәа Ракадемиа апрезидент, академик Зураб Џьапуа аҭоурыхтә наукақәа рдоктор идиплом инапы иаиркит Гәырам Гәымба. (Аԥсны Анаукақәа Ракадемиа апресс-маҵзура).
