Аҟәа. Лаҵарамза 3, 2024 шықәса. Аԥсныпресс. Аҳәынҭқарра Ахада Мирра Хотелашвили-Инал-иԥа лыԥсҭазаара алҵра инамаданы адышшылара ҟаиҵеит.
Адышшыларатә цҳамҭаҟны, ҷыдала, иҳәоуп:
«Гәалсра дула сшәыдышшылоит иналукааша аҭоурыхҭҵааҩ, археологиа, Аԥсны акультура зҽаԥсазтәыз аусзуҩы, «Ахьӡ-Аԥша» аорден III аҩаӡара занашьоу Мирра Хотелашвили-Инал-иԥа лыԥсҭазаара алҵра инамадны.
Мирра Константин-иԥҳа лыԥсҭазаара зегьы аҭҵаарадырра иазкын. Ахә ашьара уадаҩуп аԥсуа жәлар рҭоурых-культуратә ҭынха, ҳтәыла археологиеи аетнографиеи рыҭҵаареи реиқәырхареи рыҟны ллагаламҭа.
Мирра Константин-иԥҳа Хотелашвили-Инал-иԥа лыԥсҭазаара алҵра - харҭаашьа змам цәыӡ дууп аҭҵаарадырра ауаажәларреиԥш, ареспублика зегьы азы.
Гәалсра дула срыдышшылоит Мирра Хотелашвили-Инал-иԥа лыуацәа, лҭынхацәа», - ҳәа иазгәаҭоуп адышшыларатә цҳамҭа атекст аҟны.
