Аҟәа. Мшаԥымза 9, 2024 шықәса. Аԥсныпресс. Инал Гаделиа аиааира игеит, Анастасиа Погосова араӡнытә медал ланашьахеит Урыстәыла зҽаԥсазтәыз азыҟаҵаҩ А.Ф. Малина игәалашәара иазкны Тамбов ақалақь аҿы имҩаԥысуаз аҳәсеи ахацәеи рыбжьара аӡиудо азы Урыстәылазегьтәи атурнир аҿы, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.
Инал Гаделиа акапантә категориа 100 кьылак рҟынӡа иҟоу иаҵанакуа рыбжьара дықәгылон, Анастасиа Погосова – 52 кьыла иҟоу рыбжьара.
Акапантә категориа 66 кьыла рҟынӡа иҟоу иаҵанакуа рыбжьара дықәгылон Сабри Бигәаагьы, аха уи уажәазы Волгоградынтәи иааз аспортсмен диҵахеит.
Аспортсменцәа азыҟаиҵон Андреи Погосов.
Атурнир мҩаԥысуан мшаԥымза 6-7 рзы Тамбов ақалақь аҿы. Уи зынӡа рхы аладырхәит 158-ҩык аспортсменцәа.
