Аҟәа. Мшаԥымза 9, 2024 шықәса. Аԥсныпресс. Аҟәа ақалақь аҿы ахәаахәҭра-економикатә, анаука-техникатә, агуманитартә усеицура азы Аԥсны аминистрцәа Реилазаареи Ареспублика Ҟрым аминистрцәа Реилазаареи рыбжьара анапхгарабжьаратәи акомиссиа ахәбатәи аилатәара аатит.
Аԥсуа ган аҟынтәи акомиссиа напхгара аиҭоит аԥыза-министр актәи ихаҭыԥуаҩ, аенергетикеи атранспорти рминистр Џьансыхә Нанба, Ҟрым аганахьала – Ареспублика Ҟрым Анапхгара аԥыза-министр актәи ихаҭыԥуаҩ Георги Мурадов.
2016 шықәсазы Аԥсни Ҟрыми ахәаахәҭра-економикатә, анаука-техникатә, агуманитартә усхкқәа рганахьала аусеицура азы Аиқәшаҳаҭра рыбжьарҵеит. Ес-хышықәса аганқәа иҿыцу аусмҩаԥгатәқәа рыпрограммақәа рнапаҵыҩра мҩаԥыргоит.
Аԥсны-ҟрымтәи анапхгарабжьаратәи акомиссиа актәи аилатәара 2018 шықәсазы имҩаԥысит.
