Уажәазы ареанимациатә ҟәшеи ачымазцәа рыдкыларатә ҟәшеи, иара убас агинекологиеи атравматологиеи рҿы аусурақәа зегьы хыркәшоуп.  Зехьынџьара ҳаамҭа иақәшәо амаругақәа шьақәыргылоуп, зхаҭабзиара ҳараку амедицинатә цхырааразы иахәҭоу зегьы ыҟоуп. Апалатақәа рҿы апациентцәа рзы акыр иманшәалоу аҭагылазаашьақәа аԥҵоуп: иԥхоу адашьмақәа, ашьашьмаҭрақәа, ихымԥадатәиу аинвентарь зегьы рҿыцуп (ашькаԥқәа, акаруаҭқәа, астолқәа, уҳәа убас егьырҭгьы). Иаахәоуп арыԥҳақәа рыҩныҵҟа аҳауеиҭарсра азы аппаратқәа (ИВЛ), иара убас егьырҭ ихымԥадатәиу амаругақәа.  

Уажәы аусуцәа еиҳа иуадаҩу аетап ахь инаӡеит – ахирургиатә ҟәша аиҭашьақәыргылара иалагеит. Уи ҩыџьараны иршеит, руак аҿы аҳақьымцәа аус шыруц ируеит. Уи зыҟаҵоу аусура аиԥҟьара алмыршара азы ауп.  

«Ҩы-мыз ирхымгакәа аԥҟаҩцәа иҿыцу аԥҟарҭа ахь ииасыр рылшоит, уи ҳаамҭазтәи аԥҟарҭақәа џьара акала еицәаны иҟалаӡом. Убас, аԥҟаратә стол заҵәык аахәара азы  араион Ахадара ала иазоужьхеит 3 млн. мааҭ. Афинансыркра аганахьала уадаҩра ыҟам. Ҳара ҳнапхгара аҟынтәи адгылара шҳамоу аабоит», –  ҳәа илҳәеит ахәышәтәырҭа аҳақьым хада Индира Арсалиа.

Аиашазы, 2-3 шықәса рыла ахәышәтәырҭа аҭеиҭыԥш акыр аҽаԥсахит. Иҿыцны аус аура иалагеит алифт, уаанӡа уи аусура иахылҵуаз абжьы аҟынтәи апалатақәа рҿы ишьҭаз ачымазцәа ааԥшуан, уи акыр иаргәамҵуан.  Алифт аԥсахра азы араион Ахадара ала иақәхарџьхеит иааизакны иуҳәозар 2,9 млн. мааҭ рҟынӡа.  

Араион Ахадара 2021 – 2022 шш. рзы ахәышәтәырҭа азы иаанахәеит ареанимабили ирласу амедицинатә цхырааразы автомашьна «Гезельи». Ирласу амедицинатә цхыраара азы даҽа машьынак ахәышәтәырҭа азы иаахәан  2023 шықәсазы.