***Аԥсны Ауаажәларратә Палата Амаӡаныҟәгаҩ Гәыли Кьычба Урыстәыла Ауаажәларратә Палата Амаӡаныҟәгаҩ Лидиа Михеева лыхьӡала адышшыларатә шәҟәы дәықәылҵеит.

«Ҳара даара ҳаршанхеит, ҳгәаҵанӡагьы инеит Москва амҵан, аконцерттә зал «Крокус Сити Холл» аҿы иҟалаз игыгшәыгу атеррористтә акт иахҟьаны аҭынч уааԥсыра рҭахара азы иҳауз ажәабжь хлымӡаах. Ареспублика Аԥсны Ауаажәларратә Палата алахәылацәа рыхьӡалеи хаҭала сара сыхьӡалеи шәтәылауаа рҭахара инамаданы сшәыдышшылоит. Иҭахаз рҭаацәа срыдышшылоит, ахәрақәа зауз иаарласны ргәабзиара аиҭашьақәыргылара рзеиӷьасшьоит. Ҳара ари  игәыԥжәагоу акт ӷәӷәала ҳақәыӡбоит. Аҭынч уааԥсыра рыргәаҟра, рышьра иазырхоу атерроризм риашашьеи еилкаашьеи амам.  Агәра ганы ҳаҟоуп аус атәы здыруа аусбарҭақәа ари ацәгьоура шаадыртуа, ахара зду ацәгьоуцәа зегьы ақәнага ишақәыршәахо. Шәгәырҩа шәыцеиҩаҳшоит, Урыстәыла ажәлар рхьаа ҳхьаауп!»

***Аԥсны агәабзиарахьчара аминистр Едуард Быҭәба Урыстәылатәи Афедерациа агәабзиарахьчара аминистр Михаил Мурашко дидышшылеит.

«Даараӡа ҳаргачамкит хәажәкырамза 22 ахәылбыҽха хыԥхьаӡара рацәала акагьы зхарамыз ауаа рыԥсҭазаара ҿахызҵәаз, Москва амҵан аконцерттә зал «Крокус Сити Холл» иҟалаз атеррористтә акт азы ажәабжь хлымӡаах. Иҭахаз рҭаацәа срыдышшылоит. Ахәрақәа зауз иаарласны ршьапы иқәгылартә еиԥш иҟалааит.

Ари ацәгьоура аԥшьгаҩцәеи аиҿкааҩцәеи анагӡаҩцәеи ирыхәҭоу ақәнага иақәыршәазароуп.

Ахәҭакахьала, ҳара атеррористә акт аҿы ахәрақәа зауз анаҩстәи рреабилитациа аҿы ацхыраареи адгылареи рыҭара ҳазхиоуп», - ҳәа иазгәаҭоуп адышшыларатә телеграмма аҿы.

***Ҳара ӷәӷәала ари иуаҩрам акт ҳақәыӡбоит, ҳәа аҳәамҭа ҟанаҵеит Аполитикатә партиа «Амцахара».

«Абџьар зкым аҭынч уааԥсыра иааргәыдҵаны рышьра – ари акала риашашьеи еилкаашьеи змам агыгшәыгра ауп. Ҳара жәаҩыла аҭынч уааԥсыра рыԥсҭазаарақәа ҿахызҵәаз ари агәымбылџьбаратә акт ӷәӷәала ҳақәыӡбоит. Иҭахаз рыуацәеи рҭынхацәеи ҳрыдышшылоит.  Атеракт аан ахәрақәа зауз зегьы иаарласны ршьапы иқәгылааит. Агәра ганы ҳаҟоуп ари ацәгьоура ӷәӷәа ҟазҵаз ақәнага ишақәыршәахо», - ҳәа иаҳәоит адышшыларатә шәҟәы аҿы.

***«Москва амҵан иҟалаз ахлымӡаах азы ажәабжь акыр ҳаршанхеит, гәалсра дула иҳадаҳкылеит. Аконцерттә зал  «Крокус Сити Холл» аҿы иҟалаз атеракт аан зыуацәеи зҭынхацәеи ҭахаз зегьы ҳрыдышшылоит, ааха зауз иаарласны ргәы бзиахарц рзеиӷьаҳшьоит. Ҳара ӷәӷәала атерроризм ҳақәыӡбоит! Аҭынч уааԥсыра рышьреи рыргәаҟреи иазку атеррористтә актқәа рыриашашьеи реилкаашьеи залыршахом!», - ҳәа аҳәамҭақәа ҟарҵеит:  

Агуманитартә Программақәа Рцентр;

Аҟәатәи Ақәыԥшцәа Рыҩны;

Аԥсны Ахәыҷтәы Фонд;

Асоциал-культуратә аԥшьгарақәа рзы Агәыҳалалратә Фонд;

Агәыҳалалратә фонд «Асарька»;

Ауаажәларратә гәыҳалалратә еиҿкаара «Панорама»;

Аԥсны Аҳәса Рассоциациа;

Агәыҳалалратә фонд «АМШРА»»

«Амилаҭтә ресурсқәа Агәыҳалалратә фонд «Ауаажәларратә  усқәа рыклуб»;

Ауаажәларратә еиҿкаара «Аԥсны адиабеттә еилазаара»;

Ауаажәларратә еиҿкаара «АМЧ» Агәыҳалалратә Фонд «Аҿиаразы Аҳәса рфонд»;

Арҵаҩцәа рассоциациа аҵарадырраҿы аинновациақәа рзы.

***Аԥсны инхо урыстәылатәи аидгьылуаа Реиҿкаарақәа Москватәи аобласт аҿы иҟоу ахәаахәҭратә Центр «Крокус Сити Холл» иҟалаз атеррористтә акт иахҟьаны иҭахаз рыуацәеи рҭынхацәеи зегьы ирыдышшылоит.

«Шәзықәшәаз арыцҳара азы ҳшәыдышшылоит, ишәоуз агәырҩеи ахьааи шәыцеиҩаҳшоит. Урыстәыла ахьаа ҳхьаауп ҳаргьы. Иҭахаз зегьы џьанаҭ гыларҭас ироуааит» - ҳәа иазгәаҭоуп адышшыларатә цҳамҭа аҿы.

*** «Хәажәкырамза 22 рзы Москватәи аобласть, «Крокус Сити Холл» ахыбраҿы иҟалаз ахлымӡаах  акырӡа ҳаршанхеит, гәалсра дула иҳадаҳкылеит, ӷәӷәала ҳгәы ҳнархьит.

Милаҭрацәала еилоу Аԥсны жәлар рыхьӡала атеракт аҿы иҭахаз ауаа рыуацәеи рҭынхацәеи, иара убас урыстәылауаа зегьы  ҳрыдышшылоит, рхьааи ргәырҩеи рыцеиҩаҳшоит.

Ареспубликатә Уаажәларратә Еиҿкаара «Аԥсны Жәлар Реиҿкаара»;

Ареспубликатә Уаажәларратә Еиҿкаара «Аруаа»;

Ареспубликатә Уаажәларратә Еиҿкаара «Ҳара ҳаҳҭнықалақь»;

Ареспубликатә Политикатә Партиа «Аԥсны Жәлар Ракзаара Афорум»;

Ареспубликатә Политикатә Партиа «Аԥсны».