Ихадоу апроблемақәа рахь иаҵанакуеит:
- инагӡоу амедицинатә маҵзура аҟамзаара;
-иҟоу асанитартә ҭагылазаашьақәа ацқьареи ақәнагареи рнормақәа рықәымшәара;
- акрыфаразы еизаку асистема аиқәыршәара иадҳәалоу апроблемақәа;
- акамерақәеи ашьҭаларҭақәеи разымхара;
- иажәхьоу ахыбра;
-аусзуҩцәа иуадаҩу русуратә ҭагылазаашьақәа.
Иара убас, Аԥсны иҟаӡам ацәгьоура ҟазҵаз, зус ӡбоу аҳәсеи зықәра наӡам аҿари рзы ахьырхәра ахгаразы ҷыдала еиқәыршәоу аҭыԥқәа. Убри иахҟьаны иарбоу акатегориа иаҵанакуа абаандаҩцәа Аҟәа, Аԥсны аҩныҵҟатәи аусқәа Рминистрра иатәу аамҭалатәи аусӡбараанӡатәи аԥхьакырҭа аҿы иҭаркуеит. Аҳәса ахьҭаку акамерақәа ахацәа рзы иазоужьу акамерақәеи еихагылак аҿы иҟоуп. Уи иарбоу акатегориақәа рзинқәа еиланагоит, насгьы аусзуҩцәа русуа акыр иаруадаҩуеит.
Аомбудсмен ишазгәалҭаз ала, Дранда аҳаблаҿы иҟоу Аԥсны аҩныҵҟатәи аусқәа Рминистрра иатәу аамҭалатәи аусеилыргаанӡатәи аԥхьакырҭа аҿы иҭаку ацәгьоуцәа зегьы иҟарҵаз ацәгьоурақәа рыӷәӷәара иадҳәаламкәа рҭагылазаашьақәа еиԥшуп. Уи зус ӡбоу зегьы рзы ахьырхәра ахгара азы иахәҭоу аҭагылазаашьақәа шьақәнаргылаӡом.
«Аԥсны ахьырхәратә система аҿы иҟоу апроблемақәа зегьы комплексла рыӡбара, жәаҳәарада, имаҷымкәа афинанстә харџь аҭаххоит, раԥхьаӡа иргыланы ҳаамҭа иақәшәо абахҭақәеи аусеилыргаанӡатәи аԥхьакырҭақәеи рыргылара», – ҳәа илҳәеит Анас Кьышьмариа.
Раԥхьаӡа иргыланы, аҳәынҭқарра зыӡбара алнаршарц ахәҭоу азҵаарақәа ируакуп ҳәа лара иалылкааит ацәгьоуцәа ахьырхәра ахьырхырго аҭыԥқәа рҿы иахәҭоу амедицинатә цхыраара алыршара, иарбоу аҭыԥқәа рсанитартә ҭагылазаашьа ацқьареи ақәнагареи рнормақәа рақәыршәара, насгьы иарбоу аҭыԥқәа рҿы акрыфаразы еизаку асистема ашьақәыргылара.
