Аҟәа. Жәабранмза 12, 2024 шықәса. Аԥсныпресс. Аԥсны абанктә система ала 2023 шықәсазы инагӡаз аԥаратә хархәагақәа аҳәаа наҟ-ааҟтәи реикәыршара 143 млрд. мааҭ рҟынӡа инаӡоит, уи 2022 шықәсазы аиԥш-зеиԥшу аамҭахәҭа иаҿырԥшны уахәаԥшуазар 19,3 млрд. мааҭ (15,6%) рыла еиҳауп. Абри азы адырра ҟанаҵоит Аԥсны Амилаҭтә Банк апресс-маҵзура.
Абанктә системала Аԥсныҟа иаашьҭыз аԥаратә хархәагақәа реицҵалыҵ 70,2 млрд. мааҭ рҟынӡа инаӡоит, атәыла иалганы ишьҭыз аԥаратә хархәагақәа рецҵалыҵ – 72,8 млрд. мааҭ рҟынӡа инаӡоит.
2023 шықәсазы Ареспублика Аԥсны абанктә система ала аԥаратә хархәагақәа раара абас ала ишьақәгылан:
- аиуристтә хаҿқәа, хазхаҭалатәи аусдкылаҩцәа, хазхаҭалатәи ахаҿқәа Аԥсны акредиттә еиҿкаарақәа рҿы иаадыртыз рхыԥхьаӡаратә ԥхьаӡарақәа рахь иахыԥхьаӡалан 40,7 млрд. мааҭ;
- Урыстәылатәи абанктә хсаалагақәа змоу ахаҿқәа рыла Амилаҭтә шәаратә Система «АԤРА» аинфраструктура аҿы инагӡаз аоперациақәа – 20,6 млрд. мааҭ;
- Ареспублика Аԥсны асоциал-економикатә ҿиара ацхырааразы, абиуџьеттә инвестициақәа рымҩаԥгара, аинвестициатә усура адгылара аҭара, уҳәа ахықәкқәа рынагӡаразы урыстәылатәи афинанстә цхыраара - 5,2 млрд. мааҭ;
- урыстәылатәи атәанчахәы аашьҭра – 3,4 млрд. мааҭ.
- аԥарақәа рыиагара асистема ала ахыԥхьаӡаларақәа – 0,3 млрд. мааҭ.
2023 шықәсазы аиҳарак ахархәара зауз авалиута урыстәылатәи амааҭ ауп, уи ахархәара ахәҭаа аҳәаа наҟ-ааҟтәи аоперациақәа рзеиԥш мҽхакы аҟынтәи 96,2% рҟынӡа инаӡеит, Еиду Америкатәи Аштатқәа рдоллар – 3,2%, егьырҭ атәылақәа рвалиута – (ҭырқәтәылатәи алира, европатәи евро, китаитәи иуан, индиатәи руппи) – 0,6%.
