Аҟәа. Ажьырныҳәамза 29, 2024 шықәса. Аԥсныпресс. Москва ақалақь, Рахманинов Иҩны аконцертә зал аҿы қәҿиарала имҩаԥысит Аԥснытәи артистцәа рконцерт. Аконцертә программа ааиртит Аԥсны зҽаԥсазтәыз артист, аскрипкарҳәаҩы Виктор Абрамиан-Ешба. Анаҩс иқәгылеит анагӡаҩ-ҿарацәа – Москватәи аконсерваториа аҟны иҟоу анагӡаратә ҟазара Академиа астудентцәа: апианинорҳәаҩы Лана Адлеиба, Каи Хупориа, Виктор Абрамиан-Ешба иҵаҩы, альтарҳәаҩы Пиотр Бердников.
Ахәаԥшцәа иатәнатәит Софиа Сақаниа лыбжьы, лара Урыстәыла зҽаԥсазтәыз артистка, Аԥсны жәлар рартистка Алиса Гыцба лаԥшьгарала имҩаԥгаз II Жәларбжьаратәи амузыкатә конкурс аҿы Гран-при лгеит.
Анагӡаҩ ҿарацәа адгылара рыҭаразы арахь иааит акомпозитор, адерижиор Нодар Чанба, ашәҟәыҩҩы Денис Чачхалиа, аҭоурыхҭҵааҩы Лариса Ҵәыџьба, абжьгаҩ-ацҳаражәҳәаҩ Мадина Аҩӡба, Москва ақалақь аҿы инхо аԥсуаа.
«Даараӡа уеигәырӷьаратәы иҟоуп Аԥсны иахьеҵагыло аҟыбаҩ злоу амузыкантцәеи ашәаҳәаҩцәеи рабиԥара», – ҳәа Феисбук аҿы иҟоу лдаҟьа аҿы ианылҵеит Дырмит Гәлиа имоҭа Татиана Гәлиа.
