«Шьыжьы инаркны автоинспекциа агәыԥқәа аӡиа Риҵа ахь инагоу амаршрут ала аԥыԥшра нарыгӡоит. Ҳара иаанаҳкылеит, шьҭахьҟагьы идәықәаҳҵеит жәабала аӡынтәи агьежьхарԥа змам амашьынақәа. Аха, зегьы рыла ирхиоу амашьынақәагьы асы зықәнауз амҩала аныҟәара анырцәыуадаҩхогьы рацәоуп. Убас, амҩа аҟынтәи аӡиас иалаҳаит ауаа зҭатәаз амашьына. Анцәа иџьшьаны аԥстәбара ҟамлаӡеит, ахәахәа-чахәарақәа зауз ауаа ахәышәтәырҭахь идәықәҵахеит. Ҳара ас еиԥш иуадаҩу амҩа анылара ҭакԥхықәрала иазнеиларц, аӡынтәи агьежьхарԥа ала еиқәыршәам автомашьынақәа рыла аӡиа ахь амҩа иқәымларц азы ауаажәларра рахь ааԥхьара ҟаҳҵоит. Ари ауснагӡатә ишәарҭоу амҩатә ҭагылазаашьақәа рыцәцара алнаршоит», – ҳәа инаҵшьны иазгәеиҭеит Асҭамыр Ҭаниа.
12.Ажьырныҳәа.2024
Аԥсны аҩныҵҟатәи аусқәа Рминистрра Автоҳәынҭинспекциа Аусбарҭа: Риҵаҟа аӡынтәи агьежьхарԥа змам амашьынақәа рыла аҭалара азин ыҟаӡам.
Аҟәа. Ажьырныҳәамза 12, 2024 шықәса. Аԥсныпресс. Ажьырныҳәамза 12 рзы аӡиа Риҵа аҿы ӷәӷәала асы алеира иалагеит. Иарбоу амаршрут ала ацара згәаԥхо аҭыԥантәи ауааԥсыра реиԥш ҳреспублика иаҭаауа асасцәагьы рыбжьара иахьырацәоу инамаданы, Аԥсны аҩныҵҟатәи аусқәа Рминистрра Автоҳәынҭинспекциа Аусбарҭа иҷыдоу арота ахатәы еилазаара аӡиа ахь уназго атрасса зегьы иахьаҵанакуа апрофилактикатә реидтә усмҩаԥгатәқәа нарыгӡоит, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.
Автоҳәынҭинспекциа Аусбарҭа аиҳабы ихаҭыԥуаҩ Асҭамыр Ҭаниа ишазгәеиҭаз ала, Риҵатәи ареликтә милаҭтә парк аҭаларазы азин рымаӡам аӡынтәи агьежьхарԥа змам амашьынақәа зегьы.
