Аҟәа. Ԥхынҷкәынмза 5, 2023 шықәса. Аԥсныпресс. Аԥсны аҩнуҵҟатәи аусқәа рминистр инапынҵала ареспублика мрагыларатәи ахәҭаҿы амаинингҿагыларазы аусурақәа мҩаԥысуеит. Убас, Очамчыра араион аҩныҵҟатәи аусқәа Рыҟәша аусзуҩцәеи Аҳәынҭстандарти, Ашәарҭадаратә маҵзуреи ԥхынҷкәынмза 4 рзы агәаҭарақәа анеицымҩаԥыргоз Очамчыра араион аҿы ирбеит 29 хархәага. Арҭ ахархагақәа зтәыз административтә хьырхәра иақәыршәоуп, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.
Ахәҭакахьала, 24 маруга рыԥшааит Мераб Қацәба иҟны, 2 - Баҭал Кархалаа иҟны, 3 - Мераб Кверквелиа иҟны.
Уаанӡа Ҭҟәарчал араион Аҟармара ақыҭан атәыла аҩныҵҟатәи аусқәа Рминистрра аекономикатә шәарҭадареи акоррупциа аҿагылареи русбарҭа аусзуҩцәа рыла Ерик Багаҭелиеи Ҭеимураз Козаеви иртәыз акриптофермаҟны 108 маининг-хархәага ԥшаан.
Арҭ ауаа Аԥсны Аҳәынҭқарра Админстративтә Зинеилагарақәа рзы Азакәанеидкыла ахәҭаҷ 96, ахәҭа 2 инақәыршәаны административтә ҭакԥхықәра иақәыршәоуп.
Ирымырхыз ахархәагақәа аамҭалатәи аҵәахразы Ареспублика Аԥсны Аҳәынҭстандарт иатәу ашьҭаҵарҭахь инагоуп.
