Аҟәа. Нанҳәамза 3, 2023 шықәса. Аԥсныпресс. Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵра азгәаҭара аҳәаақәа ирҭагӡаны, Аԥсны Аҳәынҭқарра Ахада Ихаҭыԥуаҩ Бадра Гәынба Аԥсны Раԥхьатәи Ахада Владислав Арӡынба Имемориал аҭеиҭыԥш арҽеира азҵаара иазкны аусуратә еилатәара мҩаԥигеит. Абри азы адырра ҟанаҵоит Аҳәынҭқарра Ахада иофициалтә саит.
Иазԥхьагәаҭоуп иара убас ареспублика ақыҭақәа рҿы 1992-1993 шш. Аԥсны жәлар Рџьынџьтәылатәи еибашьра ахҭысқәа ирызку абаҟақәа реиҭашьақәыргылара.
Аилатәара рхы аладырхәит атәыла акультура аминистр Даур Ақаҩба, Аԥсны Раԥхьатәи Ахада иԥҳа Мадина Арӡынба, Амемориалтә комплекси Аҳәынҭқарратә Еилазаара «Аԥсныргылара» рнапхгараҭарақәа.
