Иқәгылоз иара убас дазааҭгылеит аҭыԥантәи ахаланапхгаратә усбарҭақәа рматериал-техникатә база арӷәӷәара, амассатә информациа ахархәагақәеи амуниципалтә усзуҩцәеи рзы аконкурсқәа рымҩаԥгара, амуниципалтә усзуҩцәа рзанааҭтә ҩаӡара ашьҭыхра, уҳәа ирыдҳәалоу азҵаарақәа.  

Ахәҭакахьала, Аԥсны аԥыза-министр ихаҭыԥуаҩ, аекономика аминистр Кристина Озган атәыла асоциал-економикатә ҭагылазаашьеи аҭыԥантәи ахаланапхгара аусуреи  рзы адырра ҟалҵеит. Аԥсны амуниципалитетқәа рҿы иҟоу атенденциа иалацәажәеит иара убас Аҟәа, Гагра, Гәдоуҭа, уҳәа Аԥсны егьырҭ араионқәеи рхадарақәа рхаҭарнакцәагьы.

Анаҩс  ареспубликақәа рмуниципалтә еиҿкаарақәа рыбжьара ахәаахәҭра-економикатә, анаука-техникатә, акультуратә, уҳәа егьырҭ аусхкқәа рыла аусеицура азы аиқәшаҳаҭрақәа рнапаҵыҩра мҩаԥысит.

Аусшәҟәқәа рнапы аҵарҩит Аԥсны Аҟәа араион ахада Алхас Ҷыҭанааи Ареспублика Ҭаҭарсҭан Высокогорныи араион ахада Равиль Хисамутдинови, Гагра араион ахада актәи ихаҭыԥуаҩ Адамыр Цишбеи Тетиушски араион ахада Рамис Сафиуллов, Гәдоуҭа араион ахада Баграт Боџьгәуеи Заински араион ахада ихаҭыԥуаҩ Пиотр Уразаикин.