сегодня 18:43
Аибашьратә Ахьӡ-аԥша амузеи аҿы аинтерактивтә експозициа «Афырхаҵа имҩа» аартра мҩаԥысит
Аԥсны Жәлар Рџьынџьтәылатә еибашьраҿы игаз Аиааира 33 шықәса ахыҵра амш аҽны Аҳәынҭқарра Ахада Бадра Гәынба В.Г. Арӡынба ихьӡ зху Аҳәынҭқарратә арратә Ахьӡ-аԥша амузеи аҿы аинтерактивтә експозициа «Афырхаҵа имҩа» аартра иазкыз аныҳәатә усмҩаԥгатә даҭааит.
Аусмҩаԥгатә иара убасгьы ихы алаирхәит Нижни Новгород ақалақь ахада Иури Шалабаев.
Аныҳәатә церемониаҿы дықәгылеит Аҳәынҭқарра ахада Иусбарҭа анапхгаҩы Беслан Ешба. Иара иазгәеиҭеит апроект аус адулара ишалагаз 2025 шықәса цәыббрамзазы. Уи анагӡара акоординациеи ацныҟәареи рзы Аԥсны Ахада Бадра Гәынба 2026 шықәса лаҵарамза 14 рзы Аҳәынҭқарратә комиссиа аԥҵаразы адҵа ҟаиҵеит.
Беслан Ешба инаҵшьны иазгәеиҭеит ҳаамҭазтәи аинтерактивтә експозициа аԥҵара шалыршахаз Аԥснытәии Урыстәылатәии аганқәа русеицуреи, акультуратә аԥшьгарақәа рзы Ахада ифонд адгылареи, Нижни Новгород ацхыраареи ирыбзоураны.
Аҳәынҭқарра ахада Иусбарҭа анапхгаҩы иҭабуп ҳәа реиҳәеит: акультуратә аԥшьгарақәа рзы Ахада ифонд, Нижни Новгород ақалақь ахадара, хаҭала ақалақь ахада Иури Шалабаев, иара убас апроект анагӡара иалахәыз Урыстәылатәии Аԥснытәии аспециалистцәа.
Аекспозициа ҿыц аҿы ицәыргоуп 1992-1993 шықәсқәа рызтәи Аԥсны Аџьынџьтәылатә еибашьра афырхацәеи Аԥсны раԥхьатәи Ахада Владислав Арӡынбеи ирызку ҳаамҭазтәи ацифратәи амультимедиатәи ӡбамҭақәа, аинтерактивтә елементқәа, аҭоурыхтә материалқәа.
