сегодня 20:05
«Софиа» 5 млн мааҭ аиуеит апрограмма «Ақыҭақәа рыҿиара» ала
Аԥыза-министр Владимир Делба усутә визитла даҭааит Ҭҟәарчал араион Кохора ақыҭан иҟоу ЗҲәА «Софиа» ацитрусааӡаратә нхамҩа.
Анаплакы қәҿиарала аус ауеит уаанӡатәи асовнхара 55 гектар адгьыл аҿы. Анхамҩа ацитрустә фонд 6 000 ҵиаа ыҟоуп, урҭ рахьынтә 30% аиҭаҳа ҿыцқәа роуп: амандарина – 5 550 ҵла, алимонқәа – 350 ҵла, апатырқалқәа – шәы-ҵлак.
Аԥыза-министр анхамҩа аеффективра ахә ҳаракны ишьеит:
«Арахь аара мзыз иаиуит шықәсқәак раԥхьа шәнапы злашәкыз даара ақәҿиара зауз аус. Уи ашәарҭара ду ацын. Аарыхра аҿиара аинвестициа дуқәа адыԥхьалан, аусура иаарласӡаны алҵшәақәа аанаго иалагеит. Араҟа аџьа амҽхак ҭбаауп», - ҳәа инаҵшьны иазгәеиҭеит Аминистрцәа реилазаара ахада.
Аҭаараан ҷыдала ахшыҩзышьҭра аҭан иҭышәынтәалоу адинамика бзиа аазырԥшуа анхамҩа афинанс-економикатә рбагақәа. Ихаданы аԥыза-министр иаликааит асоциалтә зҵаара аӡбара-араион ауааԥсыра рзы аусурҭа ҭыԥ ҿыцқәа раԥҵара. Анаплакы аҿы еснагьтәи аштат еиҿкаауп, аҽаҩра аҭагалара асезон ду азы 300-ҩык рҟынӡа адыԥхьалахоит.
Владимир Делба иазгәеиҭеит агроааглыхратә комплекси ақыҭатә ҵакырақәеи рыҿиара аҳәынҭқарратә политика аԥыжәара хадақәа ишреиуоу, аусхк иҭышәынтәаланы аизҳара шалнаршо, абизнес азы ашәарҭарақәа шыланарҟәуа. Аиҳабыра ақыҭа аекономика анырра бзиа азҭо хра злоу арегионалтә ҭыжьымҭақәа адгылара рыҭара иацырҵоит.
Анаплакы адиректор Софиа Бигәаа иацылҵеит анхамҩаҿы иааиԥмырҟьаӡакәа аусурақәа шымҩаԥысуа: ицәырҵуа ауадаҩрақәа инарықәыршәаны шықәсык ахь 4-5-нтә аиҭаҳатәқәа аус рыдулара, ахкаарақәа иааиԥмырҟьаӡакәа реиҭашьақәыргылара , амҩақәа ррыцқьара.
