Агәыԥқәа рлахәылацәа  атематикатә зҵаарақәа рҭак ҟарҵоит, Урыстәылатәи абираҟ аԥштәқәа змоу ацахақәа рыԥшаара иадҳәалоу адҵақәа нарыгӡоит.

«Ари аныҳәа еиднакылоит Урыстәылатәи Афедерациа атәылауаа зегьы. Ҳара еиҳарак ҳаигәырӷьоит ари аквест ҳџьынџьуаа рыдагьы, азеиԥш ҭоурыхи азеиԥш культуреи рыла ҳзыдҳәалоу Аԥсны ауааԥсырагьы ахьалахәу», - ҳәа азгәеиҭеит Аԥсны иҟоу Россотрудничество ахаҭарнак инапынҵақәа назыгӡо Вадим Банников.

Аусмҩаԥгатә иалахуп Аԥсны КСОРС акомандақәа, Аԥсны имҩаԥысуа Адунеизегьтәи аҿар рфестиваль Адирекциа ахаҭарнакра, Урыстәылатәи аилазаара «Адырра», Аԥсны Ахәаахәҭра-ааглыхратә палата, И.Г. Папасқьыр ихьӡ зху Амилаҭтә библиотека, икомерциатәым автономтә еиҿкаара «Аԥсны Акоманда», Ареспубликатә аҿар руаажәларратә хеидкыла «Аԥсны ҿа», «Аволонтиортә рота».

Аквест аихшьаалақәа рыла алахәылацәа адипломқәа роуеит, аиааира згаз — ахраҿеи абренд «Урыстәыла шәзааигәара иҟоуп» аҟынтәи аалыҵ роуеит. Аусмҩаԥгатә Урыстәылатәи абираҟ аицеиҵыхрала ихыркәшахоит.

Аквест еиҿнакаауеит Аԥсны иҟоу Россотрудничество ахаҭарнакра «Аволонтиортә рота» Аԥснытәи аҟәша ацхыраарала.