Аԥсуааи ачерқьесцәеи рдиаспорақәа рҟынтәи активистцәа злахәу аинициативатә гәыԥ еиҿнакааз «Аԥсны аԥкра аҵыхәтәа азышьҭаҵара!» захьӡу акампаниа Аԥсны гәыразылеи ҳаҭыр дулеи ирыдыркылеит.

Аибашьрашьҭахьтәи ашықәсқәа зегьы рзы, адунеизегьтәи ауаажәларра – Урыстәылеи, Аԥсны ихьыԥшым ҳәынҭқаррак аҳасаб ала иазхазҵаз егьырҭ аҳәынҭқаррақәеи рыда – Аԥсны иазкны азхамҵаратәи аԥкратәи аполитика мҩаԥыргон. 1992-1993 шықәсқәа рзы имҩаԥысуаз аибашьра ӷәӷәақәа рыхганы, аибашьрашьҭахьтәи аамҭазы иҟалаз аԥхасҭақәа ирзыннажьыз ахәрақәа рӷьаны, Аԥсны еиуеиԥшым аганқәа рыла атәыла аҿиара акырӡа иаԥырхагоу жәларбжьаратәи аекономикатәи аполитикатәи блокада анапаҵаҟа иҟалеит. Убри иахҟьаны, Аԥсны атәылауаа, жәларбжьаратәи астандартқәа еилаго, рзинқәеи рхақәиҭрақәеи ԥкра рықәшәеит, – амилаҭтә хаҿра ахьчара, агәабзиара, аҵарадырра, аныҟәарақәа рзы азин, Аԥсны анҭыҵ аҭаацәаратәи аиуаратәи еизыҟазаашьақәа рыхьчара.

Адунеизегьтәи ауаажәларра иахьа уажәраанӡагьы Аԥсны аԥкра иадҳәалоу аполитика ацырҵоит, Қырҭтәыла агрессиа аҿагылареи аԥсадгьыл ахьчареи рзы аԥсуа жәлар рзы ҵыхәаԥҵәара змам шьауӷаны ирзыҟалеит. Акыр шықәса раахыс аизҳазыӷьара змоу ажәларқәа хьаас ирымаӡамкәа ирыхәаԥшуеит аԥсуа жәлар ирзыруз азалымдарақәа. Ҩажәижәаба шықәса ирылагӡаны Аԥсны имҩаԥысуа ажәларбжьаратәи аблокада – уи ауааԥсыра рдискриминациа ауп – рыцҳарас иҟалаз, демократиатә ҳәынҭқаррақәа рнапы иану ақәыӷәӷәаратә мчра хархәаганы иҟалеит.

Хыхь иаҳҳәаз хшыҩзышьҭра аҭо, ҳара ҳдиаспора рџьабаа Ҭырқәтәылатәи аиҳабыра рахь ааԥхьарак аҳасаб ала ҳахәаԥшуеит, аԥҟареилагаратә ҟазшьа змоу аҿымҭра аԥыхразы, Аԥсны аԥкра аҟәыхразы.

Аԥсны ауаажәларра гәацԥыҳәарала ҳажәлар жәларбжьаратәи аԥкра аанкыларазы имҩаԥысуа акампаниа аҽаланархәуеит. Ҳара хьаҳәрада агәра ҳгоит, ҳдиаспора зегьы, аиҿкааратә усқәа рганахь ала аиқәымшәарақәа шрымоугьы, ари аинициатива акәша-мыкәша аидгылара шрылшо, Аԥсны жәлар рзы аиашара аиура ахьӡ ала.

Ҳара даара ахә ҳаракны иаҳшьоит акампаниа аиҿкааҩцәа рџьабаа, урҭ ирылшеит Аԥсны жәларбжьаратәи аԥкра ахымԥадатәра азҵаара ас еиԥш иҳараку аҩаӡара аҟынӡа ашьҭыхра. Ҭырқәтәыла Жәлар Реизара Ду адепутатцәа, ажурналистцәа, ауаажәларра рхаҭарнакцәа, Аԥсны ауааԥсыра рзинқәа реиҭашьақәыргылара иадгыло зегьы гәык-ԥсык ала ҭабуп ҳәа раҳҳәоит!

Аԥсны жәлари, аиашара адгыларазы агәазыҳәара бзиа аарԥшуа збжьы ҭызго ауаа зегьы ақәҿиарақәеи, аҭынчреи, ақьиареи, аизҳазыӷьареи рзеиӷьаҳшьоит!