Нанҳәамза 5 рзы апарламент ахыбраҿы имҩаԥысыз апресс-конференциа еиҿкаан аилазаара «Аԥсны аиҟәыҭхара аҵыхәа ԥаҳҵәап» алахәылацәа раԥшьгарала. Уи рашәарамза анҵәамҭа инаркны Ҭырқәтәыла иҟоу аԥсуа диаспора имҩаԥырго акциа иацнаҵеит.

Адиаспора аҭахрақәа рыдгыларазы арзаҳал иаԥхьеит Ҭырқәтәылатәи апарламент аоппозициа ахьӡала иқәгыло адепутатцәа. Уаанӡа аиҟәыхара атема хаз игоу аполитикатә блокқәеи ауаажәларратә еиҿкаарақәеи рықәгыларақәа рҿы ишьҭырхуазҭгьы, уажәы уи раԥхьаӡа акәны адепутаттә корпус ахәҭак еидкылоу рпозицианы акәны игеит.

Адокумент атекст даԥхьеит Ҭырқәтәыла Аусутә партиа (Türkiye Işçi Partisi) аҟынтәи адепутат, ажурналист Аҳмеҭ Шык. Аҳәамҭаҿы инаҵшьны иазгәаҭоуп Аԥсни Ҭырқәтәылеи аҭоурыхтә, аиуаратә, ауаажәларратә еимадара ҵаулақәа шрыбжьоу: XIX ашәышықәсазтәи Кавказ иҟалаз атрагедиатә хҭысқәа ирыхҟьаны аԥсуаа рӷьырак Ҭырқәтәылатәи аҵакыраҿы ишынхо.

Иахьа Ҭырқәтәыла иҟоу аԥсуа диаспора рхыԥхьаӡара, еиуеиԥшым ахәшьарақәа рыла, иара Аԥсны Аҳәынҭқарра ауааԥсыра раасҭа акыр еиҳауп.

Апресс-конференциаҿы ирылаҳәаз ихадоу аҭахрақәа адиаспореи уи иадгылаз аполитикатә мчрақәеи рпозициа иақәшәоит:

аԥсуа тәылауаҩшәҟәқәа Ҭырқәтәылатәи аҳәаа ахысразы иҵабыргу документқәаны азхаҵара;

Ҭырқәтәылеи Аԥсни рыбжьара ишиашоу амшынтәии аҳауатәии еимадара ашьақәыргылара.