Аобиект ҿыц аԥырҵеит зымаха-зышьаха еибгам ауаа иманшәаланы, ишәарҭаданы рыԥсшьара мҩаԥысларц азы.

Апроект нагӡоуп Аԥсны аинклиузивтә туризм ассоциациа апрограмма «Иманшәало Аԥсынтәыла» аҳәаақәа ирҭагӡаны. Афинанстә цхыраара ҟанаҵеит Урыстәылатәи Афедерациа  ахада игрантқәа Рфонд.

Ауаажәларратә ҵакыра ҿыц ауниверсалтә дизаин апринципқәа рыла еиқәдыршәеит. Аплиаж аҿы ԥынгылада аныҟәаразы иҷыдоу амҿтәы қәҵақәа ыҟоуп, амшын ахь анеиразы ишәарҭадоу  амҩа гоуп, иманшәалоу аԥсшьарҭа ҭыԥқәеи иҷыдоу амаҭәахәқәеи азырхиоуп.

Апроект анагӡара иалахәын Гәдоуҭа араион ахадара, арепатриациазы Аҳәынҭеилакы, Урыстәылазегьтәи жәлар рфронт, Ареабилитациатә центр «Аицхыраара», Адгәыр Аҩӡба.

Аартра ацеремониаҿы Ҭырқәтәылантәи амеценат Џьано Ашьхаруа, Ашьхаруаа рҭаацәа рыхьӡала хәыда-ԥсада аплиаж иеиҭеит иҷыдоу амыругақәа.

«Иманшәадоу аҭагылазаашьақәа раԥҵара — дарбанзаалак ауаҩы изы еиԥшу алшарақәа раԥҵареи апатуқәҵареи рызҵаара иадҳәалоуп. Гәдоуҭа араион аҿы раԥхьатәи аинклиузивтә плиаж аартра, ҳаамҭазтәи Аԥсны аҿиараҿы акрызҵазкуа шьаҿоуп. Ари апроект еиднакылеит аҳәынҭқарратә структурақәа, ауаажәларратә еиҿкаарақәа, абизнес ахаҭарнакцәа, аҳәаанырцә иҟоу ҳџьынџьуаа», — ҳәа азгәалҭеит Аԥсны аинклиузивтә туризм ассоциациа анапхгаҩы Руслана Гьергьедаа.