Аофициалтә церемониа рхы аладырхәит Аҳәынҭқарра Ахада Бадра Гәынба, аҵара аминистр Хана Гәынба, Гагра араион ахада Иури Хагәышь, Жәлар Реизара  адепутатцәа.

Иарбоу аобиект ақалақь аргылара дуқәа ируакын,ахәыҷбаҳча аиҭашьақәыргылара иаҿын аашықәса инареиҳаны. Зымҽхак ҭбаау аиҭашьақәыргылара ахыркәшара алыршахеит Аԥсны асоциал-економикатә ҿиара ацхрааразы Аинвестициатә программа аҳәаақәа ирҭагӡаны, Урыстәыла иҟанаҵо афинанстә цхыраара иабзоураны.

Акапиталтә лагалақәа рзеиԥш мҽхакы иартәеит 102 миллион мааҭ. Аобиект аҿы аусурақәа мҩаԥыргон Амуниципалтә  унитартә  наплакаы «ГРСО Гәдоуҭа». Аусурақәа рымҩаԥысшьеи рхаҭабзиареи хаҭала игәеиҭеит атәыла ахада.

Ҳаамҭазтәи ҩбаны еихагылоу ахыбра астандартқәа зегьы ирықәшәоит. Ахәыҷбаҳча 120-ҩык рҟынӡа ахәыҷқәа аднакылар алшоит.

Иҭбааҭыцәу ауадақәа еиқәыршәоуп зхаҭабзиара ҳараку аҩнымаҭәеи ахәмаргақәеи рыла, афатә ҟаҵарҭеи амедицинатә кабинети иҿыцӡоу зтехнологиа ҳараку амыругақәа адгалоуп.

Ашколқәранӡатәи аусбарҭа ҿыц анапхгаҩыс дҟаҵоуп Мирабелла Қәачахьиа.

Аҳәынҭқарра ахада ахәыҷбаҳча ахәмарырҭатә ҭыԥқәеи аҩныҵҟатәи ауадақәеи гәеиҭеит.