«Аҟәа еиԥш иҟоу ақалақь азы аԥшаҳәа даара акрызҵазкуа ҭыԥуп. Бжьаратәла, иаҳгозар ас еиԥш аҵакы змоу аҭыԥқәа 50 шықәса рахьтә знык еиҭашьақәдыргылоит, ара уи аҿҳәара иахыԥахьеит. Убри азы ҳҿаԥхьа иқәгылоуп ҩ-дҵак: ганкахьала, аҭоурых аиқәырхара, даҽа ганкахьала – ԥхьаҟа ацара, избанзар аамҭа аҭыԥ аҿы игылаӡам», - ҳәа азгәеиҭеит Андреи Назаров.

Аԥыза-министр иажәақәа рыла, ирҿыцу аԥшаҳәа ҳаамҭазтәи архитектуратә ӡбамҭақәа ирықәшәозароуп.

Апроект еиланагӡоит аестетикатә ԥшӡареи афункционал ҳараки. Аусурақәа раан ҷыдала ахшыҩзышьҭра аҭоуп аобиект аҿы археологиатә ԥшаарақәа рымҩаԥгара, уи атәылазы ари аҭыԥ аҭоурыхтә ҵакы шамоу даҽазныкгьы инаҵшьны иазгәанаҭоит.
Андреи Назаров иазгәеиҭеит аиҭашьақәыргылара апроцесс аан ауадаҩрақәа шцәырҵуа, аха башкириатәи аргылаҩцәа урҭ қәҿиарала ириааиуеит.

«Ҳара ҳзы ари даара акрызҵазкуа хырхарҭоуп. Ҳара иаҳҭахуп аиашьаратә аԥсуа жәлар ари аобиект шәышықәсала рхы иадырхәаларц. Ҳара араҟа гәахәарыла аус аауеит. Ԥхынгәымза алагамҭазы ҳусура ахәҭак ҳалгап ҳәа ҳгәыӷуеит. Агәра ганы сыҟоуп ҳазҭоу ашықәс азы аԥшаҳәа аиҭашьақәыргылара нагӡаны ишхыркәшахо, атәыла ауааԥсыреи асасцәеи алҵшәа ргәы ишахәо», — ҳәа иажәа хиркәшеит Башкортосҭан аԥыза-министр.