Аусмҩаԥгатә еиднакылеит абиԥарақәа. Аныҳәатә программа гәылҭәаахеит. Иҷыдоу агәалаҟазаара ацын ахәыҷбаҳча «Алашара» ааӡамҭацәа рықәгылара. Анаҩс асценахь ицәырҵит аԥсуа естрада артистцәа, Аҟәатәи иреиҳаӡоу азеиԥшарратә командаҟаҵаратә ҵараиурҭа акурсантцәеи ахореографиа ашкол «Акәашара амҩа» алахәылацәеи еицынарыгӡеит  авальс «Аамҭа иагәылганы». Ари ақәыргыламҭаҿы ахореографиеи, зыԥсы ҭоу амузыкеи, аеффектқәеи иҳаҩсхьоу аамҭахь ҳдырхынҳәуан. Артистцәа инарыгӡеит Асовет аамҭазтәи арра-патриоттә ашәақәа реиԥш ҳаамҭазтәи акомпозициақәагьы.

Аконцерт инаваргыланы ашҭаҿы еиҿкаан адәынтәи амаҵурҭа, иаатит атематикатә фотоҭыхырҭа ҭыԥқәеи Аԥсны ааираҿы иҟанаҵаз алагала атәы зҳәо аинформациатә цәыргақәҵеи. Ахәыҷқәа рзы еиҿыркааит амастер-класс «Акаҭран аҿы асахьа ҭаҳхуеит». Ақалақь зегьы ашәыга лашақәеи ахәыҷқәа рыччаԥшьи рыла иҭәын.

Аусмҩаԥгатә еиҿнакааит «Москва Аҩны» Москва Аиҳабыреи, адәныҟаекономикатәи жәларбжьаратәи аимадарақәа Рдепартаменти, Москватәи аџьынџьуаҩ Иҩни иҟарҵаз ацхыраарала иабзоураны.