Ари амаҭәар ицәырнаго азҵаарақәа аус рыдулара иаҿуп аҵара аминистрраҿы. Аԥсуа бызшәа арҵәаҩцәа рфорум аҿы иӡырган иахьа уажәраанӡа инагӡоу аус атәы. Арҵаҩцәа ирыман алшара уи ахцәажәара.

Ахԥатәи абжьаратә школ алагарҭатә классқәа рырҵаҩы Марица Каҷабааԥҳа уажәы актәи акласс лымоуп. «Ҳазну адунеи» ахәыҷқәа иргәаԥхоит ашәҟәы сахьала иахьҩычоу азы, урҭ рыла дара изрылшо ала еиҭарҳәоит атема, аха убри аан атекст маҷуп, ари аҭаацәа ирызцәырнагоит азҵаарақәа. Арҵаҩы лгәаанагарала, атекст иаҳа инарҭбааны иҟаҵатәуп.

«Ахәыҷқәа аурок иацәшәоит. Ашықәс зегьы акласс аҿы ицәажәо сара соуп», - ҳәа лҳәоит Марица.

Кама Адлеиба арҵага шәҟәқәа аԥсахрақәа рылагалара аус адызуло дыруаӡәкуп. Лара Уарчатәи ашкол аҿы абиологиеи ахимиеи амаҭәарқәа рылҭоит, иара убри адагьы дметодиступ араионтә ҵараусбарҭаҿы. Аҵара аминистрра адҵала, актәи акласс инаркны аԥшьбатәи акласс аҟынӡа «Ҳазну адунеи» аконцепциа аԥсахра рнапы ианырҵеит. Аспециалистцәа ашәҟәы уажәтәи аамҭа иақәыршәаны иҟарҵароуп, уи иаанаго, сахьала еиқәыршәаны, атемақәа еихышәшәо иҟаҵаны, ашәҟәы ҿыц аԥсы ахаҵаны ахәыҷқәа рҟынӡа инаргоит ауп. Кама лусураҿы длывагылоуп Алина Габниаԥҳа- Аҳәынҭқарратә университет аҿы абиологиа амаҭәар даԥхьоит. Агәыԥ данапхгаҩуп Аҵара аминистрра азеиԥш, абжьаратә, азанааҭтә ҵарадырра аҟәша аиҳабы Маииа Цыбулевскаиа.

«Ҳара аԥшьшәҟәык рҿы абызшәа иаҳа ирмарианы, ашәҟәы ахаҭабзиара шьҭыхны иҟаҵазар, аҵаратә процесс иаҳа имариахоит ҳәа агәаанагара ҳамоуп. Иаҭахны иҟоуп тема цыԥхьаӡа ажәар алагалара, иара убас акырӡа аҵанакуеит амаҭәар аинтерес аҵаҵаны ахәыҷы изнагара. Апрактикатә усура ахәыҷы дацәымшәозароуп, уи амҩа дықәиҵоит арҵаҩы. Убри аҟынтә иара изнагашьагьы хадароуп араҟа. Арҵаҩы ара дҟазоуп, арҵаҩы-даартҩуп ахәыҷы изы. Мчыбжьык ахь знык ахәыҷы амаҭәар ахьимоу, убри азы дааӡом ҳәа арҵаҩы ианылҳәа, уи рыцҳара дууп», - ҳәа лҳәоит Кама Адлеиба.

Аспециалистцәа «Ҳазну адунеи» аус адулара иалагеит ари ашықәс азы. Уажәы арҵаҩцәа идырбан арҵагашәҟәы темала ҿыц ишеихшоу. Асеминар аҿы арҵаҩцәа иаразнак згәаанагара зҳәаз ыҟоуп, уи адагьы доусы иҭахоит аматериал, анаҩс ихәыцрақәа аниҵар ахьалшо. Урҭ хшыҩзышьҭра рыҭахоит, ҳәарада, избанзар, анаҩс амаҭәар аԥсҭазаара дара рнапаҟноуп иахьыҟало.

«Ҳхәыҷқәа ибзианы рхатәы бызшәала иахьзымцәажәо, шьҭахьҟа ҳазго акоуп. Ашәҟәы атекст армариара атәы ҳаналацәажәо, уи иаанагаӡом алитератураҿы иҟоу аԥҟарақәа ҳрыцныҟәаӡом ҳәа, араҟа аус злоу ахшыҩҵак иаҳа ирмарианы аҟаҵароуп. «Ҳазну адунеи» амаҭәар ала ахәыҷы Аԥсуара, ахатәы бызшәа адырра, дахьынхо аҭыԥ бзиа ибо аҟаҵароуп иаҳҭаху», - ҳәа азгәалҭоит Кама Адлеиба.

Ари арҵагашәҟәқәа аус рыдулара апроцесс уажәоуп ианалага. Аспециалистцәеи арҵаҩцәеи ари раԥхьатәи реицәажәара акәын. Ҳәарада, ари аус еиҭа иацҵахоит, аҩганк русура лҵшәак аҟынӡа инаргаанӡа.