Ажурналистикаҿы ипрофессионалтә мҩа хациркит ААУ аҵара аниҵоз инаркны, 1994 шықәсазы аԥсуа телерадиоеилахәыраҿы аинформациатә программа «Амшеикәшара» акорреспондентс аус иуан. Аԥсышәалеи урысшәалеи арепортиортә усуреи аредактортә усуреи активла еилеигӡон: апрограмма «Аамҭа» арҿиаратә гәыԥ напхгара аиҭон, анаҩс Аԥснытәи аҳәынҭқарратә телерадиоеилахәыраҿы аинформациатә программақәа рредакторс дыҟан.

2005 шықәсазы Алхас Ҷолокәуа атәыла ахада Иусбарҭахь аусура диасит, уаҟа аинформациеи амасса-информациатә хархәагақәеи русбарҭа анапхгаҩы ихаҭыԥуаҩыс дҟаҵан. Еиуеиԥшым ашықәсқәа рзы аус иуан: Аԥснытәи аҳәынҭқарратә телерадиоеилахәыра ахантәаҩыс, Аԥсны Ахада Иусбарҭаҿы амасса-информациатә хархәагақәа рымадаразы Аусбарҭа аиҳабыс, С.И. Ҷанба ихьӡ зху Аԥснытәи аҳәынҭқарратә драматә театр адиректор хадас.

2024 шықәса нанҳәамза инаркны иахьа уажәраанӡа Аԥсны Ахада Иусбарҭаҿы амасса-информациатә хархәагақәа аус рыдуларазы Аусбарҭа напхгара аиҭоит, атәыла Ахада ипресс-маӡаныҟәгаҩыс дыҟоуп.
Аԥсны ажурналистцәа реидгыла Алхас Дмитри-иԥа изеиӷьанашьоит агәабзиара, азанааҭтә қәҿиарақәа, аманшәалара!