Атәыла ахада Ауаажәларратә палата афбатәи ааԥхьара аилазаара иҭабуп ҳәа реиҳәеит русуразы, ҷыдала иазгәеиҭеит уи ишалахәыз аԥышәа ду змоу ауаажәларратә усзуҩцәа: Сократ Џьынџьал, Давид Ԥлиа, Лиудмила Лолуа убас егьырҭгьы.

«Ауаажәларратә палата изныкымкәа ауаажәларреи амчреи рыбжьара цҳас иҟалахьан, уи ихадоу ароль нанагӡоит атәылаҿы аибарххарақәа раԥыхразы», – ҳәа инаҵшьны иазгәеиҭеит Бадра Гәынба.

Гәыли Кьычба атәыла ахада иҭабуп ҳәа иалҳәеит Ауаажәларратә палата алахәылацәа русура дахьазҿлымҳауи, ауаажәларратә форум «Аиҿцәажәара. Ақәшаҳаҭра. Аҿиара» амҩаԥгараҿы иҟаиҵаз адгылареи рзы. Лара инаҵшьны иазгәалҭеит ахада афорум аҿы иқәгылареи уи иаиҭаз ахәшьареи ауаажәларра реидкылараҿы акрызҵазкуа шьаҿаны ишыҟалаз.

Гәыли Кьычба агәрагара аалырԥшит Ауаажәларратә палата аилазаара ҿыцгьы абиԥарақәа реимадара шеиқәнархо, уаанӡатәи ааԥхьара хра злоу аԥшьгарақәа рынагӡара ишацнаҵо.

Аҳәынҭқарра ахада аԥыза-министри аминистрцәа Реилазаареи рнапы ианиҵеит аихшьаалатә резолиуциа ианыԥшуа аԥшьгарақәа рынагӡаразы ажәалагалақәа аздырхиарц.