Аусмҩаԥгатә мҩаԥысуеит мшаԥымза 3-4, 2026 шықәсазы.

Афорум еиҿыркаауеит аекономикатә усеицура аҿиара, ареспублика аинвестициатә потенциал аарԥшра, аинвестициақәа радыԥхьалара, Аԥсны аҳәынҭқарра адәныҟаекономикатә еимадарақәа рырӷәӷәара хықәкыс иҟаҵаны.

Аусԥҟа инақәыршәаны еиҿкаауп афорум азырхиареи амҩаԥгареи рзы Аиҿкааратә еилакы. Аиҿкааратә Еилакы хантәаҩыс дҟаҵоуп Аԥыза-министр Владимир Делба.

Аиҿкааратә еилакы анапы иануп:

афорум аиҿкаареи амҩаԥгареи рзы ихадоу аусмҩаԥгатәқәа рыплан ашьақәыргылара, аҭакзыԥхықәу анагӡаҩцәеи аҿҳәареи алкааны ашьақәырӷәӷәара;

афорум азырхиареи амҩаԥгареи рзы ахарџьқәа рымҽхаки реилазаашьеи рзы ажәалагалақәа рыҟаҵара;

афорум азырхиареи амҩаԥгареи ирыдҳәалоу азҵаарақәа рыӡбаразы аҳәынҭқарра напхгараҭаратә усбарҭақәеи, амаҵурауааи, аиҿкаарақәеи русура ахылаԥшра, урҭ реинырра алыршара.

Аԥсны Аҳәынҭқарра Ахада Иусбарҭа афорум азырхиареи амҩаԥгареи рзы Аиҿкааратә Еилакы аусура ганрацәала ацхыраара аҭаразы анапынҵа аҭоуп.

Аусԥҟа анагӡара ахылаԥшра идҵоуп Ахада Иусбарҭа Анапхгаҩы Б.Ф. Ешба.

Аиҿкааратә еилакы иалалеит:

Нанба Џь. Е. — Аԥсны аԥыза-министр ихаҭыԥуаҩ, Аиҿкааратә еилакы ахантәаҩы ихаҭыԥуаҩ;

Агрба Т. М. — Аҟәа ақалақь ахада;

Аџьынџьал И. А. - Аԥсны Аҳәынҭқарра Ахада иԥкаанҵа аусбарҭа анапхгаҩы;

Аиба Б. Е. - Аԥсны Аҳәынҭқарра Ахада Иусбарҭа анапхгаҩы ихаҭыԥуаҩ;

Бебиа В. З. - Аԥсны Аҳәынҭқарра Ахада Иусбарҭаҿы агуманитартә политиказы аусбарҭа анапхгаҩы;

Џьопуа Б. Ц. - Аԥсны ақыҭанхамҩа аминистр;

Зыхәба Н. А. - Аԥсны Аҳәынҭқарра Ахада ицхырааҩ;

Ақаҩба Д. В. - Аԥсны акультура аминистр;

Логәуа А. О. - Аԥсны атуризм аминистр;

Амқәаб Т. З. - Аԥсны аекономика аминистр;

Ҳагба Т. М.- аԥыза-министр ихаҭыԥуаҩ, аҿари аспорти русқәа рзы Аҳәынҭқарратә еилакы ахантәаҩы;

Ҷолокәуа А.Д. — Аԥсны аҳәынҭқарра ахада Иусбарҭаҿы амасса информациатә хархәагақәа аус рыдуларазы Аусбарҭа аиҳабы.