Роланд Берулаа иарбоу ауниверситет аҿы аҵара рҵоит 38-ҩык аԥснытәи астудентцәа ҳәа адырра ҟаиҵеит.

«Урҭ аимадаҩцәа, аитишникцәа, аенергетикцәа, иара убас егьырҭ азанааҭқәа рҿы аҵара зҵо астудентцәа роуп», –  ҳәа иазгәеиҭеит иара.

Анатоли Шамин иажәақәа рыла, ари Аԥсны азы мацара акәымкәа Нижегородтәи ауниверситет азгьы акыр зҵазкуа хҭысуп.

«Ҳара акадрқәа баша хырхарҭак рымамкәа разыҟаҵара ҳашьцыланы ҳаҟаӡам. Астудентцәа рҵара апроцесс инаркны иаҳдыруазароуп урҭ анаҩс аус ахьыруло, иарбан хырхарҭақәоу иалырхуа, раԥхьаҟа аус ахьыруло анаплакқәа рҿы аусуратә практика хымԥада рахысра ахылаԥшра аҳҭоит.  Убри азы ауп иахьа ҳара ари аиқәшаҳаҭра зҳабжьаҳҵо», - ҳәа иҳәеит Анатоли Шамин.

Аҵараиурҭа аушьҭымҭацәа ҩыџьа Аԥсны аимадаразы Аҳәынҭқарратә Еилакы аҿы аусура иалагахтеит. Аԥснытәи астудентцәа ируаӡәку Урыстәылатәи Афедерациа Ахада истипендиа иоуеит.

Анатоли Шамин иара убас Нижегородтәи анџьныр-економикатә университет иҳаҩсыз ашықәс азы ацифратә ҿиаразы иреиӷьу ауниверситетқәа рхыԥхьаӡараҿы ишыҟалаз атәы иҳәеит.

Нижни Новгород иҟоу ҳаҭыр зқәу Аԥсны аконсул Владимир Литвинчук убасҵәҟьа иазгәеиҭеит еиуеиԥшым ахырхарҭақәа рыла урыстәыла-аԥснытәи аизыҟазаашьақәа хра злоу аҿиара шамоу, ҳаамҭазтәи акадрқәа разыҟаҵарагьы уахь иналаҵаны.

«Астудентцәа ааны ибзиоу аҵарадырра роуеит. Акы заҵәык ауп иаҳҭаху, дара зегьы рыԥсадгьыл ахь ихынҳәларц, аекономикатәи ааглыхратәи аструктурақәа рҿы усурала еиқәыршәахарц», - ҳәа иҳәеит  Владимир Литвинчук.