«Аторт аизгара иалагеит ашьыжь, асааҭ 8 инаркны: аҟазацәа доусы рхатә гьамала иазнеит, ари аторт иагәылоу ала еиԥшым. Абжьааԥнытәи агәлаҵақәа ррецептқәа реиԥш акәымкәа ахаатәыҟаҵаҩцәа еиуиеԥшым агәлаҵақәа рхы иадырхәеит – алимонтә, апаҭырқалтә, амандаринатә, уҳәа. Ахаа-мыхааҟаҵаҩцәа доусы рырҿиаратә гьама аадырԥшит, дара зегьы ҟазацәоуп. Иахьатәи ҳасасцәагьы еиуеиԥшым атортқәа ргьама рбар рылшоит», — ҳәа иазгәалҭеит Светлана Габуниаԥҳа. 

Иҿыцу агастрономикатә лагалақәа рнаҩс афестиваль аиҿкааҩцәа Багаԥшь ихьӡ зху ашҭаҿы амультимедиатә шоу еиҿыркааит. Ажәҩан иаларҵеит аҳауатә мпышҭа, уаантәи адиџьеи Shiri асеҭ аирҳәон. Изҭахыз зегьы амузыка азыӡырҩра адагьы ампышҭа иақәтәаны хыхьынтәи амшын аԥшаҳәа аԥшӡара рбар рылшон.