Аҟәа. Ажьырныҳәамза 8, 2026 шықәса. Аԥсныпресс. Аетно-мурал «Аиҭаҿиара» («Возрождение») аадыртит Ҭҟәарчал ақалақь аҿы. Уи Аԥсны аҽыбӷаҟазаратә традициақәа ирызкуп.
Аҭыԥантәи аспорттә школ аҿаԥшыларатә ган аҿы иарбоу арт-обиект аԥырҵеит афестиваль «Амандарин» аҳәаақәа ирҭагӡаны. Асахьаҿы аҽыбӷаҟазацәа арбоуп, убас авторцәа аҽыбӷаҟазара аԥсуа традициақәа рҿы иааннакыло ароль аарԥшра рҽазыршәеит. Апроект аус адыруалон акоманда Street Art Abkhazia асахьаҭыхыҩцәа Арсоу Берзениеи Кадыр Тәанбеи.
«Апроект ахықәкы — атәылеи Ҭҟарчал ақалақьи рҭоурых аҭҵаара адыԥхьалара. Амурал аҿы иарбоуп ажәытә милаҭтә спорт асценақәа», — ҳәа иазгәалҭеит афестиваль аиҿкааҩ Сариа Аргәын.
Амурал аартра иазкыз аныҳәатә церемониа рхы аладырхәит араион ахада ихаҭыԥуаҩ Витали Кәыҵниа, афестиваль «Амандарин» аиҿкааҩцәа Светлана Габуниеи Сариа Аргәыни, иара убас иарбоу аусумҭа авторцәа. Афестиваль «Амандарин» ажьырныҳәамза 10-нӡа, иарбоу амшгьы уахь иналаҵаны аус аулоит.
