Испаниа — ари аныҳәа атрадициақәа еиҳа афатә иадҳәалазар, Италиеи Даниеи — еиҳа уамашәа иубаша ахымҩаԥгашьа иадҳәалоп. Иаагозар, Неаполь ақалақь аҿы аԥенџьыр икылырҩны акресложә шдыршәуа убар алшоит, уи џьоумшьароуп. Аҭыԥантәи ауааԥсыра ирҳәоит: аҩны иҿыцу џьара акы ҩналарц азы, ажәытә маҭәақәа баша ақәгара акәымкәа, абжьы рганы иршәны икаужьроуп. Даниа ауааԥсыра ракәзар, урҭ еиҳа иаамсҭашәаны рхы мҩаԥыргоит, аха еиҳа аеффектра маҷны. Ашьыжь, ажьырныҳәамза 1 азы ҳаҭыр ду зқәу копенгагенуаҩ иҩнашә аҿаԥхьа ачысмаҭәа аԥҽыхақәа еизганы ишышьҭоу ибар алшоит — уи аполициа ахь асразы ҿыҵганы иҟаӡам, уи даара ҳаҭыр–пату уқәырҵоит ҳәа ауп иаанаго. Аԥҽыхақәа шаҟа ирацәоу аҟара, убри аҟара ирацәоуп аҩызцәгьы ҳәа иԥхьаӡоуп. Убас иҟоуп скандинаваа ргәаанагарала «лайк» ақәыргылашьа.

Иапониа акәзар, уаҟа зынӡа даҽакала иҟоуп, уаҟа ҭынчроуп. Араҟа афеирверсқәа рмыцхәрас иааиҩуеит буддатәи ауахәама асаркьал абжьы — зынӡа 108–тә асра. Араҟа ишазхарҵо ала, ауаҩы адгьыл аҿы иҟоу 108 шәара даргәаҟуеит, асаркьал асрацыԥхьаӡа убас иҟоу ашәарақәа ихыҵуеит, иԥсы арҭынчуеит ҳәа ирыԥхьаӡоит. Иапонаа иҿыцу аетап еилкааны иалалоит. Адисциплина арелигиа аҩаӡараҿы иахьнагоу атәыла аҿы аныҳәаҵәҟьа ҩныҵҟала аҽрыцқьара иадҳәалоу хҭысны иҟалоит.

Исландиа акәзар, уи имитәха иҟоу амотивациатә амаана адгылара анаҭоит. Ахәыҷқәа уаҟа иахьа уажәраанӡагьы Иольстәи ацгәы ала идыршәоит — уи амульфильм аҿы иуԥыло ацгәы гәыбзыӷ акәӡам, уи аныҳәа аламҭалазы иҿыцу аласа иалху амаҭәа аазымхәаз зфо идуу агыгшәыг ауп. Иџьбароума? Ҵыбыргуп, иџьбароуп. Аха аласа аҭыжьра аԥсҭазаара аиқәырхара иахьадҳәалаз Исландиа, ари аршәага асоциалтә цхыраагӡа аасҭа акыр аус ауан. Аласа свитер умԥазар — ацгәы ду уафазшәа иԥхьаӡа.

Лаҭынтәи америкаа иԥшшәылоу аҵҟатәи маҭәа ашәҵара џьара акы адҳәалара ҵасны ирымоуп. Убас аҩежь ԥшшәы змоу аҵҟатәи маҭәа — амал иазкуп, аҟаԥш – абзиабара. Иарбоу аҵас ахыҵхырҭа акатолицизми ажәытә қьабзқәеи рҿы иҟоуп. Дара рзы аԥшшәы – амода иатәу акцент акәӡам, уи иреиҳау амчқәа рымадара аканал ауп.

Иааизакны уахәаԥшуазар, ҳара зегьы ҳахьыҟазаалакгьы, Аҟәа аума Токио аума – Ашықәс ҿыц доусы ҳара ҳтәала ҳаԥылоит. Џьоукы аматанеирала, даҽа џьоукы ажьаҳәа ду кны, џьоукых акалькулятор кны. Аха аҵасқәеи ақьабзқәеи зегьы ирыцу акоуп: хра злам шьҭахьҟа ааныжра агәазыҳәареи ақалԥад аԥштәы, мамзаргьы ажьыргәыцқәа рхыԥхьаӡара уаҵәтәи ҳԥеиԥш ишадҳәалахо уахык заҵәык иадамзаргьы азхаҵареи.

Урыстәыла Ашықәс ҿыц зегь реиҳа идуу, бзиа еицырбо, абиԥарақәа еидызкыло ныҳәаны иҟоуп. Уи азгәарҭоит ԥхынҷкәынмза 31 ажьырныҳәамза 1 ауха. Аныҳәа аҽазыҟаҵара иалагоит мчыбжьқәак шагу.

Ҩнаҭацыԥхьаӡа ихадоу аҭыԥ ааннакылоит еиуеиԥшым ахәмаргақәа рыла иҩычоу аԥсаӡҵла. Аныҳәа ихадоу символқәаны иҟоуп Аҵаа Бабадуи уи имоҭа Асҭыԥҳаи. Мраҭашәаратәи атрадициақәа иаҿырԥшны уахәаԥшуазар, Аҵаа Бабаду ишьхәанӡа инеиуа ахамы ишәуп, уи дызлеиҭаҵуа х-ҽык зҵаҳәоу аҽыуардын ауп.   

Урыстәылатәи ашықәсҿыцтәи аишәачара — ари хазы игоу акультуратә феномен ауп. Хымԥада аишәа иқәдыргыло ачысхкқәа иреиуоуп асалаҭқәа «Оливье»,  «Сельдь под шубой», иара убас зда аныҳәа рхахьы ирзаамго амандаринақәа рыфҩы лаҳалаҳо; Аныҳәа акульминациа аҵх аҩшамҭа хә-минуҭк шымбжьоу, аҳәынҭқарра Ахада ажәлар рахь ашықәсҿыцтәи адныҳәалара ҟаҵо иқәгылара иақәшәоит.  Асааҭ 00:00 рзы москватәи Акремль акурантқәа расра абжьы агара иацны агәҭакқәа рыҟаҵареи ашампанҩы зҭоу аԥатлыкақәа ашәах хаччала раартреи аԥуп. Аныҳәа агәырӷьареи афеирверкқәеи ажәлар рныҟәаралеи иацҵахоит шьыжьаанӡа.

Ашықәс ҿыц шәадныҳәалаз аҩызцәа! Ҽааныбзиала!