Иахьа ҳҿаԥхьа иқәгылоу аус хадақәа ируакны иаанхоит - ҳажәлар реидкылара. Ҳанеидгыла, аҳәоуеиқәшәара анааҳарԥш ҳамч зқәымхо ҳәа акагьы ыҟаӡам.

Ииасуа ашықәс азы ҳара иазгәаҳҭеит ҳмилаҭтә ԥыза ду, Аԥсны Аҳәынҭқарра Актәи Ахада Владислав Григори-иԥа Арӡынба диижьҭеи 80-шықәса аҵра. Уи ҳҳәынҭқарра ашьақәыргылараҿы инаигӡаз ароли хәызмаӡам илагалеи раҳаҭыр азы 2025-тәи ашықәс ҳаамҭазтәи аԥсуа ҳәынҭқарра ашьаҭаркҩы Ишықәсны ирылаҳәан.

Ҳаҭыр зқәу аҩызцәа!

Иааиуа 2026 шықәса ақыҭа иашықәсны ирылаҳәоуп. Ақыҭа ҳмилаҭтә хдырра иахыҵхырҭоу, ҳбызшәеи ҳкультуреи ҳқьабзқәеи еиқәзырхо ҭыԥуп.

Хықәкысгьы иҟоу — ҳқыҭақәа реиқәырхара мацара акәымкәан, уаҟа аԥсҭазаара ҳаамҭа иақәшәо, анхаразы иманшәаланы аҟаҵара. Ҳара аҿар рқыҭа гәакьақәа рҿы анхара, аус аура рҭаххо, ԥхьаҟатәи рԥеиԥш адырҳәало иҟаларц азы аҭагылазаашьақәа раԥҵара ҳҽазаҳшәоит.

Ахшыҩзышьҭра ду аҭан асоциалтә усхкы— агәабзиарахьчара, уи ҳаамҭа иақәшәо аиқәыршәагақәа рыла аиқәыршәара, аҵарадырра, аҿартә политика азҵаарақәа, аветеранцәа рҭаацәа адгылара рыҭара, уҳәа.

Ҳара ҳзы иҷыдалкаау аҵакы амоуп ҳастратегиатә партниорны иҟоу – Урыстәылатәи Афедерациеи ҳареи ҳаизыҟазаашьақәа рырӷәӷәара. Ашәарҭадара, аекономика, акультуреи агуманитартә проектқәеи рҿы ҳусеицура ҳтәыла аҿиареи аҭышәынтәалареи рзы ихадоу факторны ишыҟац иаанхоит. Ҳара иҳауа адгылара ахә ҳаракны иаҳшьоит, убри аҟнытә ҳтәылақәа ирыбжьоу апартниортә еизыҟазаашьақәа аринахысгьы рырҿиара азы аусура иацаҳҵоит.

Ҳаҭыр зқәу ҳџьынџьуаа!

Ашықәс ҿыц ҳҭалоит. Гәык-ԥсыкала Аԥсны иҟоу ажәлари аҳәаанырцә иҟоу ҳџьынџьуааи Ашықәс ҿыц рыдныҳәало ҭаацәацыԥхьаӡа ирзеиӷьасшьоит агәабзиара, агәамч, анасыԥ аизҳазыӷьара, аманшәалара.  Ҳаԥсадгьыл Аԥсны аҭынчреи аҭышәынтәалареи ҟалааит!