«Арҭ азҵаарақәа зегьы ҳара ҳмилаҭтә ҿиара иазырхоу, аԥыжәара змоу ракәны иҳадаҳкылоит. Ҳәарада, ҳара анагӡаратә усбарҭақәа, аиҳабыра аус рыцуа арҭ ахырхарҭақәа рынагӡара ҳҽазаҳшәалоит», - ҳәа  иҳәеит Лаша Ашәба.

Апарламент аиҳабы иажәақәа рыла, ахада инашьҭымҭа Аԥсны Апарламент ахь идәықәҵахоит аԥыжәара змоу документк аҳасабала, анаҩс ахырхарҭақәа инарықәыршәаны апрофильтә еилакқәа рахь еихшахоит.

«Хара имгакәа Аҳәынҭқарра Ахада Бадра Гәынба Жәлар Реизарахь иҟаиҵаз инашьҭымҭа апрофильтә комитетқәа рҿы инарҭбааны аус рыдулара мҩаԥгахоит. Адепутатцәа анашьҭымҭа аҿы  иазгәаҭаз асоциалтә политика, аҵарадырра, агәабзиарахьчара, ашәарҭадара, аинфраструктура, аенергетика, аҿар рыҿиара уҳәа актуалра злоу ахырхарҭақәа рыла ажәалагалақәеи анормативтә шәҟәынҵақәеи еиқәдыршәоит», - ҳәа иҳәеит Жәлар Реизара-Апарламент Аиҳабы Лаша Ашәба.