Адныҳәалараҟны иҳәоуп:

«Ҳаҭыр зқәу Аԥсны Аҳәынҭқарратә шәарҭадара Амаҵзура аофицерцәа, аветеранцәа, аусзуҩцәа!

Ишәыдысныҳәалоит 1992 шықәса ԥхынҷкәынмза 4 рзы Владислав Арӡынба инапы зҵаиҩыз Иреиҳаӡоу Асовет ақәҵарала иаԥҵаз акрызҵазкуа аҳәынҭқарратә усбарҭа – Аҳәынҭқарратә шәарҭадара Амаҵзура Амш!  

Аԥсны Аҳәынҭқарра Ашәарҭадара Амаҵзура Ареспублика ашәарҭадара алыршара асистемаҟны аҭыԥ ҷыда ааннакылоит. Шәара ламысцқьала, ҭакԥхықәрала амаҵзура мҩаԥыжәгоит, аҳәынҭқарратә интересқәа, ҳауаажәлар ршәарҭадара, аконституциатә шьақәгылара аҭышәынтәалара рыхьчара шәаҿуп занааҭдыррала, Аԥсадгьыл аҿаԥхьа ишәыду аԥхықәра нагӡо.   

Ҷыдала иҭабуп ҳәа расҳәоит амаҵзура аԥҵара ахыҵхырҭақәа рыҟны игылаз аветеранцәа, урҭ иахьагьы хәы змаӡам рԥышәа аусзуҩцәа ҿарацәа ирымардоит аҳәынҭқарратә шәарҭадара аусбарҭақәа рытрадициа бзиақәа шьақәырӷәӷәаны.

Ишәзеиӷьасшьоит агәабзиара, ачҳара, аихьӡарақәа амаҵзураҟны, шәыҩнаҭақәа рыҟны ахирра агымзааит. Акрызҵазкуа, аҭакԥхықәра ду зцу шәусура есқьынгьы ҳаҭырқәҵарала иазгәарҭалааит ҳауаажәлар! Шәныҳәаз!».