2025 шықәсазы ауалафахәқәа рышьҭыхра аҳәынҭқарратә социалтә ԥгаԥса азы ацхыраагӡатә шәатәқәа раҳасабыркраан ҳасаб ззухо Афонд ахарџьқәа рышьҭыхра цәырнагеит. Убас, актәи акатегориа иаҵанакуа асанатор-курорттә хәышәтәра азы апутиовка ахәԥса 45-60 нызықь мааҭ рҟынтәи 80-120 нызықь мааҭ рҟынӡа ихалеит. Иара убас ауалафахәқәа рышьҭыхра ахшаараура азы аԥаратә цхыраагӡатә шәатәқәа рзы ахарџьқәа ирыцнаҵеит.

Инарҵауланы аԥсуа бызшәа аҵара зцу ахәыҷтәы лагерь апрограмма анагӡараан  ирацәаны адҵаалара аиуит, зыԥсы зшьоз ахәыҷқәа рхыԥхьаӡара акыр иацлеит, уи инамаданы ахарџьқәагьы ирыцлеит.

Ауадҳара иҟоу ашьха иаԥну ахәыҷтәы лагерь аргыларазы ахарџьқәа  2025 шықәсазы афонд абиуџьет апараметрқәа рышьақәыргылараан ахарџьынҵа иалагалаӡамызт.  

Аҳәынҭқарратә социалтә ԥгаԥса ала ацхыраагӡатә шәатәқәа ршәара азы ҳазҭоу аамҭазы  ахарџьқәа бжьаратәла рхышәа-ҵышәа мызкахьы 13 инаркны  18 млн. мааҭ рҟынӡа инаӡоит.  

«Афонд аҳәынҭқарратә социалтә ԥгаԥса ала ацхыраагӡатә шәатәқәа ршәара аганахьала аҭакԥхықәрақәа зегьы рынагӡаразы еиҭаҵуа ацәынха ала иазхо аԥаратә хархәагақәа амоуп, афинансқәа Рминистрра аҟынтәи иназыцҵоу аԥаратә хархәагақәа радыԥхьалара аҭахны иҟаӡам», – ҳәа инаҵшьны иазгәеиҭеит афонд анапхгаҩы Бакур Бебиа. Ажьырныҳәамза 1, 2025 шықәса рзы Афонд аԥаратә хархәагақәа рцәынха 33 млн. 373,7 нызықь мааҭ рҟынӡа инаӡон.