Ауаажәларра, адинмаҵзуҩцәеи анаукатә еилазаареи рхаҭарнакцәа хадара злоу азҵаарақәа ирылацәажәеит: ҳаамҭазтәи Аԥсны аҵарадырреи арккареи инарыгӡо ароль, иара убас атрадициақәеи ҳаамҭазтәи ацәырҵрақәеи рыбжьара абаланс.

Аԥсны иҟоу Урыстәыла аус ацуразы Ахаҭарнакра анапхгаҩы инапынҵақәа назыгӡо Татиана Степанова акультура-рккаратә усура аусхкы аҿы жәларбжьаратәи аусеицура иҵоу аҵакы ахадара азгәалҭеит. Уи иара убас аҿар аус рыдулара аҵаки, дара рзы анырратә знеишьақәак разырхиареи хымԥадатәиуп ҳәа инаҵшьны илҳәеит.  

Агәуманитартә ҭҵаарақәа Ринститут адиректор Арда Ашәба аҿар рдунеихәаԥшьышьа ашьақәгылараҿы анаука инанагӡо ароль азгәеиҭеит. Уи иара убас иахьатәи ҳаамҭазы акырӡа аҵанакуеит апатриотизми атәылауаҩратә знеишьеи ҳәа иазгәеиҭеит.  

«Ҳара иҳаӡбеит астол гьежь ари атема иазаҳкырц, избанзар, иахьатәи ҳаамҭазы уи акырӡа аҵанакуеит – апатриотизми атәылауаҩратә знеишьеи, урҭ Аԥсадгьыл ахь абзиабароуп, уи аинтересқәа рыхьчара азыхиароуп, уи аԥеиԥш азы иҭакԥхықәроуп», — ҳәа иҳәеит Аԥсуаҭҵааратә институт аиҳабы Арда Ашәба.

Ауаажәларратә Палата алахәыла Сократ Џьынџьал амилаҭтә традициақәа рықәныҟәара инарыгӡо ароль дазааҭгылеит. Уи инаҵшьны иазгәеиҭеит аԥсуара ахаҭара ашьақәгылара аҿы ихадоу цхыраагӡаны ишыҟоу. Иара игәаанагарала, ҳаамҭазтәи аҭагылазаашьақәа рҿы, аҿар аинтернет аҟынтәи аиҳарак хра злам анырра анроуа, уи ԥхьаҟа ацара иаԥырхагоу факторны иҟалар алшоит.

Асоциал-економикатә ҭҵаарақәа Рцентр адиректор Олег Дамениа ҳаамҭазтәи ауаажәларратә еилазаараҿы ицәырҵуа апроблемақәеи еиҵагыло абиԥара рааӡара актуалра злоу азнеишьақәеи ирызку ажәахә ҟаиҵеит.

Аԥсуа Аиашахаҵаратә Уахәама ахада, аиереи аб Виссарион (Аԥлиаа) иқәгылараҿы ааԥхьара ҟаиҵеит адоуҳатә хыҵхырҭақәа разыхынҳәаразы, ауаатәыҩсатә хдырреи адунеихәаԥшышьеи аморали рышьақәгылараҿы Ҳазшаз инаигӡаз ароль ахаҿаагара, иара убас анцәахаҵаратә уасиаҭқәа рыла ишьаҭарку ацәаҩашәаратә ааӡара иаҵоу аҵакы ахадара аилкаара.  

Астол гьежь иалахәыз еффективра злоу адоуҳа-цәаҩашәаратәи апатриоттәи ааӡара аҭаацәеи аҵарадырратә усбарҭақәеи анаукатә еиҿкаарақәеи ауаажәларратә еилазаареи Ауахәамеи реимадарала мацара ауп ишзалыршахо ҳәа агәаанагараҿы еицҿакхеит.

Акультуратә, аҭоурыхтә, адоуҳатә ҭынха аиқәырхареи еиҵагыло абиԥарақәа рызнагареи Аԥсны иҭышәынтәалоу аҿиареи аизҳазыӷьареи алзыршо ихадоу ахықәкқәа раҳасабала иалкаахеит.