Апоет ажәеинраалақәа рыҩразы агәазҭазаара иоуеит аиҳарак иԥсадгьыл гәакьа асахьақәа анибо, иааигәа-сигәа иҟоу иуаажәлар рыгәҭа даныҟәоу, хкырацәала ишьақәгылоу ибеиоу ижәлар ркультура аҟынтәи. Иара ирҿиара ирацәаны атемақәа амҽханакуеит: адоуҳатә ҭышәынтәалара аԥшаара аҟынтәи абзиабара аҟынӡа, иара убас абзиеи ацәгьеи реиҿагыла.

Иара зегьы реиҳа бзиа ибо апоетцәа рхыԥхьаӡараҿы иҟоуп – Владимир Маиаковски, Сергеи Есенин, Едуард Асадов, аԥсуа литература аҿы – Баграт Шьынқәба. Сандро Аџьынџьал иажәақәа рыла, ажәа азҟазацәа иара ҷыдала анырра ирҭеит, урҭ рырҿиамҭақәа данрыԥхьо иара ирацәаны аилкаарақәа изаатуеит. Иажәеинраалақәа руак аҿы иара даӷьсҭантәи апоет Расул Гамзатов иахь ихы рханы иҩуеит:

«Как безмятежно вдоль течёт река –

В ней вижу я особое смирение,

И мудрость седовласого орла –

Такие у тебя стихотворения».

Сандро Аџьынџьал иажәеинраалақәа лассы-лассы алирикатә мелодиақәа рныԥшуеит. Иара ирҿиараҿы апатриоттә тема убасҵәҟьа ихадоу ароль нанагӡоит. Ирацәаны иажәеинраалақәа иан лықалақь гәакьа Ҭҟәарчал, хатәгәаԥхарала Аԥсны жәлар Рџьынџьтәылатәи еибашьраҿы еибашьуаз ирызкуп.

«Сегодня был услышан первый выстрел.

Сегодня первый плач услышан тут:

Они погибли за свою Отчизну –

В народе их героями зовут».

Автор ипоезиа аҿы иҷыдоу аҭыԥ ааннакылоит Владислав Арӡынба, аԥсадгьыл ахьчаҩ иаҳасабала уи ихаҿсахьа, апоет ирҿиара атема хадақәаны иҟалоит:

«Спасибо, гордый Владислав!

Орёл на небе пролетая,

Напоминает нам о вас.

Мы побеждали, погибая».

Ажәеинраалақәа реизга  «Сара ари зегьы гәыла исыҩуеит» («Я это сердцем всё пишу») – шықәсык инареиҳаны автор аус здиулоз аусумҭа ауп.

«Автортә аизга апубликациа азҵаара шықәсык акәӡам ианықәгылаз. Иарбоу аамҭа аҩныҵҟа сара иаԥысҵеит 200 инареиҳаны ажәеинраалақәа, урҭ зегьы сгәаҵантәи иаауа ацәаныррақәа, сызхьаауа, сзыргәамҵуа, сзыргәырӷьо, уҳәа ацәаныррақәа аадырԥшуеит. Аизга ахьӡ ианыԥшуеит гәыкала сыззыҟоу зегьы, сара уи шызныруа», – ҳәа иҳәоит Сандро Аџьынџьал.

Ашәҟәы «Сара ари зегьы гәыла исыҩуеит» («Я это сердцем всё пишу») А.С. Пушкин ихьӡ зху москватәи атипографиа аҿы иҭыжьуп.