Аҳәынҭқарратә автоинспекциа Аусбарҭа амҩаҿы аныҟәара иалаху зегьы рзы ишәарҭаданы амашьына арныҟәцара акультура ашьақәыргылара иазырхоу аусмҩаԥгатәқәа ркомплекс мҩаԥнагоит.

«Ари аусура ихадоу ахырхарҭақәа иреиуоуп ареспубликатә мҩаду иаваршәны асоциалтә ӡырга зну атематикатә баннерқәа рышьақәыргылара. Арҭ абаннерқәа амашьынарныҟәцаҩцәеи ашьаҟауааи игәаланаршәоит амҩатә ԥҟарақәа рықәныҟәара шхымԥадатәиу, амҩаҿы агәҽанызаара аарԥшра шахәҭоу», - ҳәа иҳәеит Дамеи Аҩӡба.  

Аамҭак ала Аҩныҵҟатәи аусқәа Рминистрра Аҳәынҭқарратә автоинспекциа Аусбарҭа активла аилыркааратә усура нанагӡоит, амассатә информациа ахархәагақәа рҿы иааиԥмырҟьаӡакәа асоциалтә видеороликқәа рырбара еиҿнакаауеит. «Ҳара дарбанызаалак иҟынӡа анагара ҳҽазаҳшәоит имариоу, аха убри аан даараӡа акыр зҵазкуа ахәшыҩҵак: адисциплинеи егьырҭ амҩа иану ҳаҭырқәҵарала рызныҟәареи аԥсҭазаарақәа еиқәнархоит.

Ишәхашәмышҭын, амҩақәа рҿы ашәарҭадара доусы ҳҟынтәи иалагоит», – ҳәа амашьынарныҟәцаҩцәеи ашьаҟауааи рахь ихы рханы иҳәоит Дамеи Аҩӡба.