Анапхгаҩы иажәақәа рыла, ааигәа аԥыза-министр Владимир Делба  иҳаҩсыз ашәышықәса 30-тәи – 40-тәи ашықәсақәа рзы аҭыԥ змаз аполитикатә репрессиақәа ирылаӡыз ргәалашәара анаунагӡатәра иадҳәалоу азҵаарақәа  рзы ақәҵара инапы аҵаиҩит.  

Гагра араион Ахадара ԥыхьатәи НКВД ахыбра ахьыҟаз аҭыԥ аҿы – 40-тәи ашықәсақәа рзы аҭыԥ змаз аполитикатә репрессиақәа ирылаӡыз ргәалашәара анаунагӡатәра иазку амузеи аартра азԥхьагәаҭаны иамоуп.

«Аха иарбоу аусура изалагаӡом араҟа аԥсыбаҩқәа шаанымхаз зырҵабыргуа адыррақәа рыда. Макьаназы аҳәара уадаҩуп арҭ ажрақәа рымҩаԥгара иаҭаххо аамҭазы. Урҭ анхыркәшазалак ашьҭахь еиқәыршәахоит инарҭбаау аҳасабырба, уи аԥыза-министр идгалахоит. Убри ашьҭахь ауп амузеи азы аӡбамҭа анрыдыркыло», - ҳәа иҳәеит Ҭемыр Амԥар.

Гагра араион Ахадара ажрақәа рымҩаԥгараан ихымԥадатәиу аматериал-техникатә еиқәыршәара зегьы ахахьы иагеит.  

«Ақәҵара инақәыршәаны анапхгарабжьаратә аусуратә гәыԥ аԥҵахеит. Уи напхгара аиҭоит аҭоурых-культуратә ҭынха ахьчаразы Аҳәынҭқарратә усбарҭа аиҳабы Гарик Сангәылиа. Аусуратә гәыԥ аилазаараҿы иҟоуп аҭоурых-культуратә ҭынха ахьчаразы Аҳәынҭқарратә усбарҭа аспециалист хада А.А. Агрба, Гагра араион абыргцәа Рхеилак ахантәаҩы Рудольф Алшәындба, Аԥсны агәабзиарахьчара Аминистрра аҟны иҟоу аӡбара-медицинатә експертиза азы Ареспубликатә биуро аиҳабы Геннади Бобуа, Иҷыдоу аҭагылазаашьақәа рзы аминистр актәи ихаҭыԥуаҩ инапынҵақәа назыгӡо Тигран Делибалтиани сареи», – ҳәа иҳәеит Гагра араион ахада ихаҭыԥуаҩ Ҭемыр Амԥар.

Аусуратә гәыԥ анапынҵа аҭоуп археологиа-ексгумациатә усурақәа рымҩаԥгара аиҿкаара. Ауаа рыԥсыбаҩ ԥшаахар, зыԥшра ҟамҵакәа урҭ рыҵхреи анаҩс Аԥсны Ашьаусмҩаԥгаратә Закәанеидкыла анормақәеи аӡбара-медицинатә експертизеи инарықәыршәаны иахәҭоу ауснагӡатәқәа рмҩаԥгара еиҿказаароуп.