Асаркьал иакапануеит – 110 кьыла. Уи 1992–1993 шш. Аԥсны жәлар Рџьынџьтәылатәи еибашьра аҿы хабарда ибжьаӡызи ԥхынҷкәынмза 14, 1992 шықәса рзы иҟалаз Лаҭатәи атрагедиа иалаӡызи ргәалашәаразы Воронежтәи асаркьалтә зауад аҿы идырҭәеит. Уи азы агәаларшәагатә нҵамҭа ануп асаркьал мраҭашәаратәи аган аҿы.

Асаркьал мрагыларатәи (ахаҿратә) ган аҿы Ацқьа Гьаргь Аиааирагаҩ – аныхабаа жәҩантәи ахылаԥшыҩ иныхачаԥа асахьа ануп.  

Хыхьтәи аган аҿы аԥсышәала «Анцәа иџьшьоуп» ҳәа аҩыра ануп.

Асаркьасырҭа аиҭашьақәыргылареи асаркьал аахәареи иазкыз аусура зегьы ажәлар рхарџь ала имҩаԥган. Асаркьал ашьақәыргылара ашьҭахь аеиеи Далмат Гоԥиа асаркьал аԥшьара иазкны анцәамаҵура мҩаԥигеит. Абри азы адырра ҟанаҵоит Аԥснытәи аиашахаҵаратә уахәама ателеграм-канал.