Аилатәара рхы аладырхәит Апарламент адепутатцәа, Аԥсны Аконституциатә ӡбарҭа ахантәаҩы Диана Ԥлиа, асоциалтә еиқәыршәареи адемографиатә политикеи рминистр ихаҭыԥуаҩ Кама Аӡынба, Аҳәынҭқарра Ахада Иусбарҭа азинтә ҟәша аиҳабы Наҭелла Ломиа, ААУ азиндырратә факультет адекан Сергеи Смыр, азиндырҩцәа Лаша Цаавеи Саид Гәылариеи.

Азакәан апроект аҳәынҭқарратә маҵзура аинститут анорма-зинтә шьақәыргылара аганахьала иҟоу азакәанԥҵараҿы аҭыԥ змоу абжьахақәа рырҽеира хықәкыс иҟаҵаны еиқәыршәахеит.

Азакәан апроект аиқәыршәаҩцәа ргәаангарала, иарбоу азакәан апроект ианыԥшуеит Аԥсны уажәтәи аԥсҭазаара иашьашәалоу ҳаамҭазтәи жәларбжьаратәи астандартқәеи аҳәынҭқарратә маҵзура аиҿкаара апринципқәеи.

Азакәан апроект аҳәынҭқарратә маҵзура асистемеи апринципқәеи, иара убас аҳәынҭқарратә маҵзура ахь адкылара, уи анагӡареи амаҵураҟынтә ахақәиҭтәреи, уҳәа аҳәынҭқарратә маҵурауаа рзинқәеи рыԥхықәрақәеи аҳәынҭқарратә маҵзура иадҳәаланы ицәырҵуа ақәиҭымтәреи аԥкрақәеи, аҳәынҭқарратә маҵурауаа рмаҵуратә хымҩаԥгашьа аганахьала ахыдҵақәа, амаҵурауаа раттестациеи рратациеи, аҳәынҭқарратә тәылауаҩратә маҵзура амаҵураҭыԥқәа, аҳәынҭқарратә тәылауаҩратә усзуҩцәа рыкласстә чынқәа, руалафахәы рызшәара, аҳәынҭқарратә маҵурауаа рсоциалтә гарантиақәеи, уҳәа егьырҭ аспектқәа  ҳәаақәнаҵоит.

Аилатәара мҩаԥигеит аҳәынҭқарратә маҵзуразы азакәан апроект аус адуларазы аусуратә гәыԥ напхгара азҭо адепутат Ерик Рштуни.