Аҳәынҭқарра Ахада атәыла анапхгара ахь анапынҵа ҟаиҵеит иааиуа ашықәс инаркны ижәытәӡоу аҭҵаарадырратә усбарҭа ахыбра ареконструкциа алагаразы.  

Агуманитартә ҭҵаарақәа Ринститут адиректор Арда Ашәба Аԥсныпресс акорреспондент диҿцәажәо еиҭеиҳәеит ари аӡбамҭа аинститут аусзуҩцәа ишрыдыркылаз атәы, насгьы уи атәылазы иамоу аҵакы дазааҭгылеит. «Аҳәынҭқарра Ахада Бадра Гәынба ҳинститут даҭааит, хаҭала акабинетқәа зегьы дрыҩнысны рҭагылазаашьа гәеиҭеит, иацы Аҭоурыхдырҩцәа-кавказҭҵааҩцәа жәларбжьаратәи рфорум апленартә еилатәара аҿы иара алаҳәара ҟаиҵеит Агуманитартә ҭҵаарақәа рзы Аԥснытәи аҳәынҭқарратә Институт аҭоурыхтә хыбра шеиҭашьақәргылахо. Аинститут аусзуҩцәа зегьы даара еигәырӷьеит ари ажәабжь. Афоорум ахь иааз асасцәагьы 2026-тәи ашықәс аинститут азы иҷыдахоит ҳәа иазгәарҭеит», - иҳәеит Арда Ашәба.

Аԥснытәи агуманитартә ҭҵаарақәа Ринститут ахьыҟоу ахыбра  – Аԥсны аҭоурых-культуратә ҭынха абаҟа ауп. Уи дыргылеит 1912 шықәсазы.

Аибашьра ҟалаанӡа аинститут ахьыҟаз аԥшаҳәаҿы игылаз ахыбра жьҭаарамза  22, 1992 шықәсазы ақырҭуа гвардеиццәа ирыблит.

«Аԥсуа-қырҭуатә еибашьра анхыркәшаха ашьҭахьҵәҟьа, уажәы Аинститут ахьыҟоу ахыбра аҿы аамҭақәак ирылагӡаны  дыҟан Аԥсны Иреиҳаӡоу Асовет ахантәаҩы Владислав Арӡынба. Аԥшаҳәа аҿы игылоу анапхгаратә хыбрақәа ркомплекс ахь даниас, иара аинститут иазаанижьит ари ахыбра. Убри инаркны Аидгылара амҩала игылоу ахыбраҿы аиҭашьақәыргыларатә усурақәа мҩаԥырымгаӡацт», - ҳәа иазгәеиҭеит Арда Ашәба.

Агуманитатә ҭҵаарақәа Ринститут ахыбра ареконструкциа иааиуа ашықәс инаркны иалагаоит.

«Уадақәак аиҭашьақәыргылара мацара акәымкәа ареставрациа аҭахны иҟоуп, уи азы ааԥхьара рыҭатәхоит аспециалистцәа-арестовраторцәа, урҭ аҭыӡқәеи аҭуани рҿы иҟоу асахьанҵақәа еиҭашьақәдыргылоит. Уи, жәаҳәарада, акыр аамҭагьы ахарџьгьы ацзаауеит. Аха, егьа ус иҟазаргьы, Аҳәынҭқарра Ахада уи ҟаҵатәуп, ахыбра аԥхьанатә иамаз архитектуратә ҭеиҭыԥш азырхынҳәтәуп ҳәа иҳәеит. Ҳара даараӡа ҳаигәырӷьоит Аҟәа ақалақь аҿы зегьы реиҳа иԥшӡоу ахыбрақәа иреиуоу ахыбра ареставрациа ахьымҩаԥгахо», - ҳәа иҳәеит Агуманитартә ҭҵаарақәа рзы Аԥснытәи аҳәынҭқарратә Институт адиректор Арда Ашәба.