Адныҳәалараҿы, ахәҭакахьала иҳәоуп:

«Ҳаҭыр зқәу 1992–1993 шш. Аԥсны Аџьынџьтәылатә еибашьра аветеранцәа! Ҳаҭыр зқәу ҳауаажәлар!

Аԥсны Жәлар Реизара – Апарламент ахьӡала ишәыдысныҳәалоит Аиааиреи Аԥсны Аҳәынҭқарра Ахьыԥшымреи рымш!

1993 шықәса цәыббрамза 30 – ҳтәылаҟны аныҳәақәа ирныҳәоу, аԥсуа жәлар рҭоурых аҿы аҵак дуӡӡа змоу рыцхәуп. 

1992–1993 шш. Аԥсны Аџьынџьтәылатә еибашьраҟны даҽа аамҭанык иеиԥшымкәа милаҭрацәала еилоу ҳажәлар, Ҳаԥсадгьыл ахьчаразы игылаз ргәымшәареи реидгылареи, ҳаибашьцәа рфырхаҵареи рхачҳареи анааԥшыз ауп.

Хашҭра рықәым аҭынч ԥсҭазаара ҳзаазгаз, ихьыԥшым атәылаҟны аҟазааразы алшара ҳазҭаз зегьы. Ҳара ахә ҳаракны иаҳшьоит хаҭалатәи илагала Аԥсны Аҳәынҭқарра Арбџьар мчқәа Рыдҵаҟаҵаҩ хада, Аԥсны Аҳәынҭқарра Актәи Ахада Владислав Григори-иԥа Арӡынба.

Аиааира – аветеранцәа рыԥсҭазаара иахәҭакуп, ишьақәдыргылаз Аԥсны Аҳәынҭқарра ахақәиҭра иасимволуп. Хаҭа-хаҭала иаҳгәалашәоит ҳара Аԥсны зхы ақәызҵаз аибашьцәа. Рыхьӡ кашәара амоуроуп зхы иамеигӡакәа Аԥсуа Ҳәынҭқарра иазықәԥоз зегьы.  Хьӡи-ԥшеи рыгымзааит иҭахаз ҳфырхацәа, рҿаԥхьа ҳхырхәоит зыԥсы ҭаны иҳавагылоу ҳфырхацәа! 

Аиааира ҳзаазгаз рҳәахьа нагӡо, иахьа ҳара ҳҳәынҭқарра аргылара, арҿиара амҩа ҳануп уи аԥеиԥш лаша чаԥо, ахақәиҭреи ахьыԥшымреи есааира ишьақәырӷәӷәо.

Аԥсны жәлар зегьы ирзеиӷьаҳшьоит агәабзиара, агәамч, аҭынчра, аихьӡара ҿыцқәа!»