Иахьа Гагра ақалақь аҟны ихацыркхеит XXIV Жәларбжьаратәи  атеннистә еицлабра «Аԥсуа Шлиапа ду –2025 шықәса» Аԥсны Аҳәынҭқарра Аҩбатәи Ахада Сергеи Багаԥшь игәалашәара иазку. Традициала аицлабра Аиааиреи Ахьыԥшымреи рымш инамаданы имҩаԥысуеит.

Аныҳәатә ҟазшьа змаз аицлабра аартра иазкыз аусмҩаԥгатә далахәын Аԥсны Аҳәынҭқарра Ахада Бадра Гәынба.

«Ҳаҭыр зқәу аицлабра алахәцәа! Ҳаҭыр зқәу асасцәа!

Сара сзы аҵак ду амоуп XXIV Жәларбжьаратәи  атеннистә еицлабра «Аԥсуа Шлиапа ду –2025 шықәса» аартра сахьалахәу. 

Аиашазы, зымҽхак ҭбаау ари ауснагӡатә аспорттә хҭыс аҳәаақәа ирҭыҵхьеит. Уи аԥсны-урыстәылатәи аиҩызара атәы зҳәо даҽа ҿырԥшыга бзианы иҟалеит.

Ари аицлбра аԥҵаҩыс дыҟоуп, аидеиагьы зтәу Константин Фиодор-иԥа Затулин иоуп. Иаҳа ианыуадаҩыз аамҭақәа рзы, Аԥсны аҭагылазаашьа аныбааԥсыз иара гәыкала хьаас иман, ибжьы ҭыгангьы изыргаз аполитикцәа дреиуоуп. Аԥсны жәлар ари рхашҭӡом, ахәгьы ҳаракны иршьоит илагаламҭа ду.   

Ҳаҭыр зқәу аицлабра алахәцәа! Азин сышәҭозар ишәзеиӷьасшьар сҭахуп аихьӡарақәа, аҵак ду змоу ахҭыс аԥхьаҟатәи аҿиара. Ақәҿиарақәа шәзеиӷьасшьоит!» – ҳәа атурнир алахәылацәеи асасцәеи дрыдныҳәало иҳәеит Бадра Гәынба.

Аицлабра аиҿкааҩцәас иҟоуп: ИАР атәылақәа ринститут, Шәача Аҩызцәа рыклуб, атеннистә клуб «Аԥснытәи Ашлиапа ду», Гагарин ихьӡ зху акосмонавтцәа ртеннистә клуб, атеннистә клубқәа «Амҵәыжәҩақәеи» «Аҳәааи».

Аицлабра мҩаԥысуеит Аԥсны Ахада Гәынба Бадра, Аҳәынҭқарратә еилакы «Ростех», АО «Рособоронекспорт», МТВК «Синдика-О» иҟарҵаз адгыларала.

Аицлабра аиҿкааратә еилакы Ахантәаҩыс дамоуп – Аҳәынҭқарратә Дума адепутат     Константин Затулин.

2011 шықәса инаркны аицлабра Аҩбатәи Ахада Сергеи Багаԥшь ихьӡ ахуп.