Аконференциа алахәылацәеи асасцәеи аусмҩаԥгатә аламҭалазы Владислав Григори –иԥа Имемориал амҵан ашәҭ шьыҵәрақәа рышьаҭаҵарала ҳаҭырла дыргәаладыршәеит.  

Аконференциа апленартә еилатәара аалыртит Аԥсны Аконституциатә ӡбарҭа ахантәаҩы Диана Ԥлиа. Лара IV Жәларбжьаратәи анаука-практикатә конференциа аиуристтә зҵаарақәа жәпакы рыспектр амҽханакуеит, аконституциатә ргылара, азакәанԥҵара аҿиареи Аԥсны аӡбаратә система аусуреи иадҳәалоу уахь иналаҵаны ҳәа иазгәалҭеит. Уи ҷыдала дазааҭгылеит Владислав Арӡынба аԥснытәи аҳәынҭқарра ашьақәгылареи атәыла азинтә система аԥҵареи рҿы иара илагала анализ азура.

Адныҳәаларатә ажәахә ҟаҵо дықәгылеит Жәлар Реизара-Апарламент Аиҳабы Лаша Ашәба. Уи В.Г. Арӡынба инапхгарала аԥсуа ҳәынҭқаррара ашьаҭақәеи ареспублика ҳаамҭазтәи азинтә системеи  шьақәгылеит ҳәа иазгәеиҭеит. Ҳхыҵхырҭақәа разхьахьаԥшра, Владислав Григори-иԥа иҭынха азхьаԥшра, аконституциатә шьақәгылареи азакәан ахадареи анаҩстәи арӷәӷәара аус азы актуалра аҵоуп иахьагьы  ҳәа иҳәеит иара.

Аконференциа аусура рхы аладырхәуеит Урыстәыла анаукатә иуристтә еилазаара иԥхьагылоу ахаҭарнакцәа – административтәи, аконституциатә зин аусхкы аспециалистцәа, Урыстәыла аиуристцәа Жәларбжьаратәи реидгыла алахәылацәа, знаукатә усумҭақәеи ззанааҭтә усуреи  рыла аиуристтә наукеи апрактикеи рыҿиара анырра азҭо аҵарауаа.

Аконференциа Аконституциатә ӡбарҭеи Аԥсны анаукақәа Ракадемиа аекономикеи азини Ринститути рыла еиҿкаауп.